Saturday, August 27, 2016

Puonj Simeo Melkio, Migori, 28/02/1989: An E Piatruok Mar Piny




Dala Joseph Ojwan’g

Weche Motelo

1.       Erokamano. Ooh, obed piny duto nyikwa Abraham.
2.      Nyithi Nyasaye, an’geyo ni wan kod seche machuok ma Nyasaye Wuon ema on’geyo sane. Nyasaye dwaro mana ngima gi kwe gi bedo gi mirembe.
3.      Ooh, Bikra Maria Mtakatifu, min Nyasaye, ne onyono thuol gi tiende e Chula Fatima, Esbon piny Joreno, Pochogis.
4.      Onyono thuol ma on’gogo olemo ma rembe ochwer ma oloke mach maoktho; noriwo thuol kod dwe.


Nyasaye Ohero Ji Duto

5.       Ooh, Nyasaye wuon polo gi piny, en okuon’go jakon’go, okuon’go jamer, jachode okuon’go dhi e mach.
6.      (To bende) Nyasaye wuon polo gi piny en onge gimoro amora marachne kata maberne. Oriwo duto tenden’g, jogo richo to jogo beyo tee!
7.       To kwe gi mirembe ema obedie nyithind Nyasaye. To gima rach achiel en in kawiyi owil kod lemo.
8.      Mar Nyasaye en wachni, nobadhi iwuon. Chunyi en mari, ringre en mari, koro ka in n’gama ber to mak Nyasaye mondo obedie chunyi, odagie kaka dalane ma nyaka chien’g higni gi higni. (Amen).

Jachien Lari Kod Nyasaye

9.      Jachien bende lari kod Nyasaye. Kata e pinyka, jochiende larowa kod Nyasaye.
10.     Jachien mangima mapok otho modhi e mach lari kod Nyasaye. Bende anenogi kuoma, gilara kod Nyasaye ni mondo awe tim Nyasaye.
11.     To Nyasaye to odagi kuoma, owacho ni: “Ma nyathina, ok anyal pogora kode kata matin.” Eeh, Nyasaye odagi kuoma kabisa.
12.     Nyasaye dwaro mondo abed osiepne, mondo abed nyathine mane ochweyo chon ka ohero e ich. Emomiyo an atwera kuom Nyasaye!
13.     Piny polo en mar jok maricho, piny polo en mar jok mabeyo.
14.     N’gato ka n’gato ter chunyi kuom Nyasaye ahinya. Nyasaye dwari mondo ibed osiepne.
15.     Kata in ja serikal kaka an, Nyasaye dwari mondo ibed osiepne.
16.     Kik ibed osiep jachien. Ka jachien oheri Nyasaye odagi, to ka Nyasaye oheri jachien bende odagi ok odwari nikech in jasike.
17.     Ka in osiep jachien, Nyasaye koro in jasike. Nyasaye koro kuon’gi akuon’ga kendo oweyi nikwop iwacho ni in jasike. Nyasaye bende oweyi e lwet nono e bwo loch polo gi piny.

An Adak ei Roman Katholik Man’geny

18.     Emomiyo waduto watimo niya, nema an’go? (Ji olo niya: Nema en mich mar chunywa, ma Nyasaye miyowa amiya, matimowa nyithinde mohero, kendo mowinjore donjo e polo.)
19.     Kata kamano, an adak ei Katholik man’geny. Ooh, anadak man’geny kanyo achiel gi Fadha William Agoya, Fadha Storm, Bishop marwa kod Fadha Chalis Dereba.
20.    Kata kamano nyithindwa, yor polo diny, yor mach maoktho lach. Ji madhi e mach maoktho n’geny ahinya moloyo nyithindwa.

Maria Nyar Annah gi Eliakim Adiera

21.     Emomiyo Maria bende ne oywak e puodho mar Eden. (Noywak kowacho) ni n’gat ma winjo chik Nyasaye, n’gat ma konye n’gicho e wan’g dhoot, n’gat ma konye n’gicho e dhorangaye, n’gatno jahawi maokrum kendo piny polo nobed mare ma kata tho ok enobil gi dhoge.
22.    Nyithi Nyasaye, mano to apako ni Maria owacho adieri ma an akia.
23.    To ndalogo bende ne okonyo Nyasaye chweyo lope, ne otugo kod nyithind ji. Kendo kane pok ochom tiend gode, Maria ne nitie!
24.    Maria nyar Eliakim, nyar Annah. To un uwacho ni nyar Annah ka ngero. Ooyo, en nyar Annah chuth!
25.    Nikech Annah en dhano ma onyuolo Maria. To en nyar Eliakim dichwo kaka an.
26.    Eliakim to kia gima onyuolo; okia ni onyuolo hono, okia ni onyuolo an’go? (Ji duoko: Honoooo).
27.    Omiyo nyithindwa, ich en kit kiew. Kata unauna ji kaka an dhano, gima anyuolo akia. Akia ni anyuolo malaika, akia ni anyuolo Nyasaye, akia ni anyuolo an’go.
28.    Emomiyo kik n’gato woundi ni par (dala) joka n’gane jochiende ema opon’go. In bende dalau ti nyuolo punde? Dalau inyuolo mana guogi gi n’geye?
29.    Ma emomiyo ka jo Nyasaye ikwiny godo kendo iyanyo to dalani bende tinde nonyuole mana thuonde. Kare ok inyuole dhano?
30.    Maria en dhano. To ka ogik e wan’ge to en ruodh ruodhi.
31.     Maria kingi mar kinge nikwop onyuolo Nyasaye ma waneno gi wan’gwa e pinyka kata ei polo bende (Roho timore marach). Eeh, mondo un’ge kabisa! Aonge wichkuot.

An Akawo Kos e Katholik Itali

32.    An abedo e kanisa misen higni man’geny. Achakora ka pod a kidoro, nyaka abedo nyaruath madundo, kendo nyaka abedo jaduon’g ei misen, Roman Katholik piny Itali.
33.    Eeh, uwacho ni udhi kawo kos; ukawo kos mar twecho ji e yo ka? “Adhi kao kos”, kos mag logo remb ji ni eka mondo ibed n’gama riek?
34.    Iriambo! Nyasaye biro wan’gi e mach maoktho, jajuok marach, chuny mochido!
35.    On’ge seto ji gotieno kuma ji leme, mach olu pieri Satan marach! Into akuon’gi, Nyasaye odagi chuth mogik!
36.    Iseto dhako kod chuore gi wende moluongo mondo okonye lemo, mach oluwi! Nyasaye odagi chuth! Mano kata ikawo kos, mano ibam. Kaw kos mar Nyasaye. ( Jasomo on’ge ni Simeo wuoyo kuom jal momonje kod polise ka en e dala Josef Ojwan’g).
37.    An bende ne adhi kawo kos e piny Itali, (ma) abedo Padri higni man’geny. Abedo Ak-Padri, abedo Vika-Padri, kaaye to odhiega mo mar Bishop, Bwana William Onyango. Ma pinya tee!
38.    Ka odok e sunga to an e sunga, ka odok e nyadhi to an e nyadhi!
39.    Yande onge n’gat ma tala ka. Yande an Bishop mar pinyni nyaka chop Isbania, ma adhi nyaka Suba Kuria. Eeh, ma adhi nyaka Ulaya, piny jo Amerika, kata piny jo komunisti, Rasia.
40.    Omiyo, kumoro amora onge kuma diny ne an Simeo Melkio. To ka alin’g, to alin’g!
41.     To kama ugombono, eeh! Chak uru chon ugomb mach maliel. Nyasaye biro wan’gou.
42.    Kik n’gato kinyie oganda kata Fadha mar Legion Maria! Magi joga tee! (Osiemo polise mokelne). Jogena opon’go polise ka ma jo Legion Maria, moko tiyo ei Ami, to moko nitie ei Keya.
43.    Ea, ugombogi, jo Legion Maria ma jo bunde, gin ka. Aah! Hapana chezea mimi, kik utug koda!
44.    To nyo gichanda gi wach ni mondo ayie anyisgi mana n’gama ne obiro yanya e choo. Adagi ni aah! Ooyo, wegi, akiagi. Nyasaye ema on’geyogi.
45.    Kik upar ni wat afuwo, an jatelo mar piny.
46.    Lemuru ka ubwok ne piny, to bende kik une n’gato kangelo wuoth ni ii: “E chaa, chiedhonogo chaa!”
47.    Ooyo omera, ibiro moto e badi kayiem. Ibiro chamo mach gi dhogi osiepna. Kiriek to lin’g mos gi dhogi achiel. Cham kuon mos gi chiegi eodi, ahulo gi thuon. (Roho dhau ahinya).
48.    To ka ogik e kwe, an e kwe to an e piny. Koro to un’ge chon ni achamonu nyadhi.
49.    An e piatruok mar piny to an e sunga mar piny. Mano un’ge chon.

Ka Sunga to an e Sunga

50.    Simeo Ondeto ja Kano, ka sunga kuom sunga, n’gai kuom n’gai. Ka uhero mondo utim gima chunyu gombono wa mondo piny owan’g ka Sodoma gi Gomorah! Kuhero tho! Athiano gi thuon!
51.     Ahero Nyasaye, un bende heruru Nyasachani. An Nyasaye oloka ka an ja mach. Kata gi sani a jamach!
52.    Emomiyo nyoro Athiano ne nyithindo (polise) ni: “Kik utug koda ahinya, jela ok aluoro. An jela en simbana”
53.    Adak Kapenguria jela, adak choo Lodwa jela, nikwop pinyni. Pinyni an ema akelo, ooh, ajieke moko ok adwar ni mondo opiel kuoma.
54.    Rembwa ochwer malit ahinya. Jaluo, eeh! Rembe ochwer, ng’ama ipakoni lak onagi ni to otho ne piny!
55.     Kik uwuor (upar) ni mita pinyni pinyu. Ma piny Joluo. Oyawore duto! Ma piny Joluo kod Maragoli.
56.    Maragoli ni ka, eeh? Ugochwa ni ka? Udwa tugo kod ji, eeh!
57.     Jok ma okelo pinyni gi rembgi, Joluo, jo Unyore, jo Maragoli, kose Maragoli onge e pinyni? To Unyore onge e dalani? To Joluo wegi-wegi mane kelo piny gi remo gi loch gi okumba onge e pinyni?
58.    Alright, lamuru Nyasaye. Ka ogik e akwede to akwede, ka ogik e eeh to eeh! Ka ogik e mos to mos!

Ikreuru ne Lweny Mar Lemo

59.    Yesus wacho niya: “Oganda moseikore ni lweny”—mondo ulam Nyasaye kod adieri. Ok waikore ne lweny gi dhano wadwa to waikore ni lemo, lamo Nyasaye, lamo an’go? (Ji duoko: Nyasaye).
60.    Ka I ikori ne lweny ni Nyasachi, Nyasaye mane okeli e piny nono, kata nduchi moro bende ok imiye Nyasaye kata achiel.
61.     Donge omiyi minu nono? Aah! Dang n’gato yanyi sani ni ifuwo ka wuoru, bende diwinj kode maber? Ok de upo ka unegoru? Kata obe dipo ka oweyi maok onegi?
62.    Ok en (wuoru) en Nyasachi? To meru ok Nyasachi ker mokuongo? Ok ne otin’gi e iye ma opuki piny? Donge yawa? (Ji duoko: Kamano…).
63.    To an’go ma monou paro mineu gi wuoneu? Lamuru Nyasaye, ukwane wuoneu bende monyuolou, ukwane mineu monyuolou bende.
64.    Dine onge mama ok dak aneno oko kata adi? (Ji duoko: achiel). Kata itiyo tich polis, par meru gi wuoru, par owetegi, par nyiminegi. Eeh, kose bunde ema okagoi emomiyo ikia nyithindu? Oyawore tee?
65.    Ooh, owadwa, dalani to thirno; pi wan’g ochomi tiir! Kata irawera kamano, pi wan’g n’giyi ochomo dalau.
66.    Wan’g ni eh Baba lemna, jochiende go koko e ita, bembena nega! Baba, mama bende otho! Kare in ma ijemone meru gi wuoru, in ma ijemone in iwuon, dalani be kethore.
67.    Ho piny mos. Wan e weg piny ma okelo Uhuru, Freedom! (Roho timore ahinya). Kik itug koda ni wan mana ji. Kik n’gato chae president mara!
68.    Heeh! Wachamo wiye ma, wawuotho e piny ka gi nyinge! Nyasaye kod serikal gin achiel.
69.    Sani to aloso matek mondo uwinji, mondo wang omaka otieno kaka nyocha omaka chande. To ere jela madiroma mondo adhiye wa?
70.    Migori ka to ahewo, Kisumu be ahewo. Aah! En jela mane made aromie? Jende te, tee, ahewo tee!
71.     Eeh, ka adhi kacha, adhi ketho polise; adhi ketho askeche marito mabuse (Roho timore malich). Koro nyisauru kama dang aromie. Dang arom kanye? Kata ikunyo piny jela, darome! Adhi ketho joka be!
72.    Chakuru chon uweya apuonj piny. Ee, jok ma uneno ni ugeno ni jobunde go, mago jo Legion Maria tee! To mago jo Katholik pep!
73.    Koro dang utera kanye? A nyisauru kuma dang aromie? Kata udhi utweya e Kipsigis, koro jogo tee Jogena, koro gi penja: “Chamge mising.” To koro ma achamo wiye ni; donge en chamge mising?
74.    Aa, chesuru wa sani ane awe maok dak atweyou tee! Uchak chon utan’g, tan’guru ka law n’gech. Awacho gi thuon.
75.     To ka idhi itweya ei Luo, aah, “omera, oyawore, kata oimore.” Kanyo be arome aroma. Many uru anena gwenge madutera wa.
76.    Kata itera ei Kakamega ni kuro ema wan’g nodhi othoye, aa, adhi nwan’go osiepena. “Were, mirembe, aah! Omwami chindiko nakonyesia mto.”
77.     Ogoyi nono, ni ee, kayiem. Ni ee, aah, neka neka. To kiny n’gama okeli kanyo kata ka en polis, a kiny idonjone itweyogo. Koro yawa, kasara. Donge ok anyuolone kasara? Aah, kose miriambo?
78.    Ani kuma dang aromie ema mondo umanyna adhie, an bende adichuo dichiel. Uhuru to akelo gi thuon gweno gi okumba gi simba. Mano kende. (Roho timore malich ahinya).
79.    Awacho gi thuon ni dhi idonj ni Simeo owacho ni en osiep Arap Moi dichiel. Gi thuon! Dhi idonjna abiro ban’gi, an bende a dichwo ka in.
80.    To awacho ni piny Kenya, Uganda gi Tanganyika okwe mayom e n’guono Nyasaye (ji olo: Amen). Duol obedie achiel Kenya, Uganda, Tanzania, nyaka loka Misri kuma yawa dhi kawe kos cha, nyaka Itali, Ingereza, nyaka Russi, piny mangima; piny mangima okwe mayom e n’guono Nyasaye (ji olo: Amen).
81.     In nomine Patri, et Filio, et Spiritu Sanctus (ji olo: Amen).
82.    Piny nokel achiel, weuru pogo piny. An ema oora mondo anyisu mondo piny mangima obedie achiel. N’gama opingo to adwokne (Wuonwa) wach wa.
83.    To en ema owachona ni mondo piny obedi adi? (Ji olo: Achiel). To mana gi lemo.  To mjumbe mae pinyuni to kata uhero mana keto Jalan’go to uket aketa Jalan’go mondo obedie, kata ka en Abaluhya to dichiel. Uluw ban’ge.
84.    Jowa josiasa dwaro ketho piny gi remo nan’go? Uriambo! Bure! Rongo yenyu! Adagi!
85.    Ka ija Legion Maria ipogo piny to aah, into nyaka atweyi; to ka en serikal to ohewa. Mano adwoko ne Moi wach ni, “aah, jogi negore dhi itheg gi kendi koda majeshi.”
86.    Ane kaok dak un’gwel n’gwech kawuono gi bunde e die n’geu! Jomiriambogi! Upusi yenyu!
87.    An aloso ka an’geyo ni an koda Daniel Arap Moi, obiro konya kata gi sani. Jopog piny ton’g an’geye, to sim nyaka Kabarak sani gi thuon.