Puonj Simeo Melkio, Bondo Nyapiedho, 16/7/1989

Jadolo Nyaka Bed Japuonj Maber

1.       Jesus ne en Japuonj kendo Jadolo maduon’g.

2.       (Emomiyo) Jadolo mar kanisa nyaka obed ng’ama on’geyo chike dini, on’geyo Katkaism gi Sakramit, kendo on’geyo chikrruok duto.

3.       Ma eka Jadolo nyalo puonjo joge maber. Kopuonjo Jokristus Matrimonio to opuonjo gima osetimo.

4.       Kik opuonj gima pok otimo, mano ok ber.

5.       Nyaka obed ja dhako achiel moloyo ode, maok lagre kod mon gi nyiri ahoyaye. (Nyaka) obed gi luor.

Japuonj Maber Mar Legion Maria

6.       Japuonj mar Legion Maria nyaka oluor Jadolo mar Nyasaye nikech mano e jatende moyiere mondo opuonj Jokristus.

7.       Achaye mar Japuonj ok ber. An abedo Japuonj e Katholik to nene onyisa ni ka agoyo chonga piny to nyaka ago maber.

8.       (Kigoyo chongi to) kor achwich kuongo eka kor acham luwe. Ok kaka magu mapuonjo puonj mobam kaegi. Moko bende goyo “E Nying Wuon” mobam.

9.       Jo askari mane oguro Jesus e mane ogoyo chong gi achiel piny ka gi jare kendo ka gi goyo ombulu e lepe.

10.     Jopuonj Legion Maria nyaka puonj gi kod Jo Padri eka gibed Jopuonj Jokristus mabeyo.

11.     To bende Pate bende chal kodgi, kia gimoro amora.

Chike Ne Jopuonj Dini

12.     Onge thuolo mondo Japuonj opuonj Jokristus kapok opuodhe kod Padri mare ni oja dhako achiel, ochamo Sakramit, oseriwo matrimonio, kendo olony e puonj.

Chike Ne Jo Padri

13.     To ka Japuonj otamore (onge e Misen), to Padri e Japuonj maduon’g e kanisa.

14.     (Ja Padri nyaka ne) ni Jokristus nyaka ng’e Sakramit kod Katkaism. Jok moko yudo baptism to kia; (moko chamo Sakramit) to kia kata ringre Ruodhwa mochamo, bende okia ni tiende en an’go.

15.     Ka Jokristus kia gigi duto to wach ni ewi Japadri. Kata iweni iler to polo midhiye onge, nyaka chien’g iyal kod Jokristus magi e dhorangach.

16.     Nyaka iyal kodgi e polo nimar niweyogi gitimo Sakrilego to in Siasa ema iketo e kanisa.

17.     Ing’eyo jok maricho gi jok mabeyo, mach oluw pieri gi timbeni go marichogo.

18.     Japuonj kik obed Japuonj ma Padri ywakne, obed osiep Padri moloya.

Puonj Simeo Melkio, Jerusalem Amoyo, 30/7/1984

Denda Ok Ber

1.       Awinjo ka denda ok ber kendo atuora matek. To gima duon’g madan’g anyisu en ni adwaro dhi wuodha moro ma kata ng’ato ok adhigo.

2.       Adhi mana kenda ma kata Oyier (Dalmas) ok adhi go; kata jatichna ok adhigo.

3.       To abiro mana luwo dier nam ka.

Akia Gima Ochomou

4.       Akia ni an’go mochomou. Joka Jakobo to ne ochako chon, neok gichal kodu kama ma kata awachonu to ulin’g alin’ga kama.

5.       To yawa chien’g moro wach nomwomu, koro eka unuchandru kendo unutem to ok ununyal.

6.       To katho sani to nomau ringra kendo nolal godo nono. To kokawa (ringra) to ibiro ng’ad ng’uta oko.

7.       (Ka otimore kama) to enonegu ka koro ilara (ringra) kendo piny ka piny penjo gima onega.

8.       To yawa, an ka atho to kik atiek ndalo an’gwen kapok oyika, kata kaber to kik atiek ndalo adek kapok oyik ringra. Ka atieko ndalo an’gwen to mano ukoso ne Nyasaye, kata an bende.

Ji Duto Onyombi

9.       Gima daher mar nyisou (kendo) ema: ng’ato ka ng’ato onyombi. Kata in Bishop, kata Kadinar, kata Padri, kata Papa Mtakatifu, chak chon inyombi.

10.     Mano ok en mana Injili, en Sheria.

11.     Kapok ikendo to kendi, to kaonge to kik isom Misa Mtakatifu.

12.     Awacho kamoro amora, kata Nairobi, Mombasa, Tanzania nyaka Kongo, kamoro amora ji onyombi.

13.     Deacon kata Toto Misa moti to ni en Toto Misa onge, ochak chon onyombi. Sheria.

14.     Dhako to en achiel maler kendo moriw godo arus (matrimonio) maler.

Weuru Laro Lowo

15.     To gima achak anyisue en ma: ng’at malaro lowo ochak chon owe gadier.

16.     To ka in ema ichielo chiel ma kata gweno ok kal, to ng’e ni inipur e polo kucho, makata ichako puro mabor kaka yor Mombasa kucho to nyaka yor Dodoma, to ka iol to chiethni ema ichamo, laki bende ohore malit.

Jachode Ok Adwar

17.     Jachode, jakaw mondji, adagi, yie unyombi yawa piny rach.

Lemuru Mathoth

18.     Ka uyie lemuru matek. Kata ituo to tem ilem.

19.     Gimoro biro timore ma nyaka nene ne pod ok otimore, to bende ok nochak otimre kendo, en masira maduon’g moloyo.

20.     To kech biro malich. Ma (masani ni) to en midenyo maka otami okinyi to odhiambo to ichiemo.

21.     To kech (moro) biro malich ma Ja Legion Maria ma lemo kod adiera kende ema nokwo. Ka ochopo Otieno to obiro (Ja Legion malemo kod adiera) po mana ni oyien’g.

22.     Ne akonou ni puonjreuru chamo pi (riyo kod yath) to udagi, mano wachu.

Utamoru Winjo Puonj

23.     Awuoro gima ochamou ma omiyo utamoru winjo puonj Nyasaye.

24.     Ndalo ochopo ma ng’at marach odonjo e kindu mopogo rombe kendo weche (maricho) wuok e kindu, awuoro.

25.     Jachiend pogrruokni, ng’a mokele to an pok apogo ji? Opogo ji (rombe) koda.

26.     Ng’at madwaro Ukabila to mach ma iye.

27.     Ja Ukabila en Jachien. En emane okelo ukabila (pogrruok) e polo ema omiyo Mikael (Malaika Maduon’g) nokedo kode motere e mach maoktho.

28.     Omiyo jogi, mopogore gi, gin jo Lusifer.

Puonj Simeo Melkio Kopango Kombe Legion Maria, Uranga Legion Maria, 8/10/1989

Erokamano Ne Nyasaye

1.       Erokamano wagoyo ne Nyasaye momiyowa chiemo nono to ok wachulo gimoro. Koso nitie ng’ama ochulo Nyasaye gimoro?

2.       Chien’g rienynwa nono, koth chwenwa nono, dwe bende rienynwa nono. To onge gima wachulo Nyasaye kata achiel.

3.       Koroni, Nyasaye bende bandhowa; wan kod gope Nyasaye mathoth. Ok walame kod adiera; walame to ajuoke bende pod wadhiye; kendo pod wasero mond ji kod nyi ji. Adhon’g bende pod wagoyo.

Nyasaye Dwaro Bolrruok

4.       Jakristus en ng’ama obolore. Onyap seche duto, en ng’ama muol, chunye ler, ojaluor, kendo ohero Nyasaye.

5.       An ka adonjo e dalani, an kod Jo Malaike mathoth ahinya. Moko fuyo mana e kor polo kae, kendo timbeu mautimo gi neno te. Gin e masaidi (joneno) maga.

6.       Ang’o momiyo uwuondore ni ulemo to ngum bende pod un’gino? Pod imadho njaga kod puga. Nyasaye biro bandhi chunyi in owadwa kata nyaminwa.

7.       Piny polo idhiye kod jok manyap lilo, joma odimbore lilo.

8.       Ang’o momiyo uyanyoru kendu? Luorruru jodongu mondo Nyasaye ogwedhu.

Maria e Yor Polo

9.       Bikra Maria e wuon polo, kendo omor gi jok malame lilo (maler). To jachode, jamiriambo ma hango ne wadgi wach, mach oluw pieri tiir.

10.     An ang’eyo ni nogoya malit ne wach Legion Maria, to aneno ka morni owiyou.

Ng’ato ka Ng’ato Omak Kare

11.     Ng’ato ka ng’ato omak kare. Ka in sista, mak karino kendo imokie chuth. Ka in bradha kamano (mak karino), madha bende ong’i tije mar madhano. We gombo tij ng’ato.

12.     Jowuond mang’eny biro wuok mondo giwuond jo Nyasaye ka giwacho ni Yesu echa en e tiend yien cha, to kik uyie kodgi.

13.     Ndalo bende biro ma gombou biro terou kama rach. To (ng’euru maler) ni duon’g ok ter ng’ato e polo. Kata an duon’g ok tera e polo.

Kom Papa Mtakatifu

14.     Jok moko osebiro kuoma ni mondo amigi kom Papa Mtakatifu. Giwacho ni Papa (Timotheo Atila) yomyom, to atamogi atama.

15.     An onge ng’ama ne okela e pinyni. Wuonwa (Nyasaye Wuon) e mane oora (e pinyni). Bende an aonge owadwa kata nyaminwa. Unie owetena to kendo un e nyiminena.

16.     Timotheo ne oyier kod polo, kendo Bikra Maria e mane owacho mondo obed Papa Mtakatifu mokwongo kuom jorotenge.

17.     Iluwe kod Kadnar Dean, Lawrence Chiaji, mano e jalupne. Ka Timotheo onge to Chiaji kawo kare.

18.     Ban’g Chiaji to Owino owadwa. To aneno ka (Owino) biro chandou ban’ga kasetho. Obiro dwaro mwandu mondo umiye. En to Serikal ema notieke. To koduogo to urwake nimar Yesus bende oweyo ne joma ne onege.

19.     Rafael Otieno Adika mondo okony Chiaji tich. Ka Chiaji onge to Rafael ema kawo kare.

20.     Awinjo ka jok moko luongo Rafael ni bradha, an to ang’eyo ni en Kadnar chuth, kendo enie “acting” mar Chiaji. Ka Chiaji onge to (Rafael) obet e kom. Modon’g go to koro akia.

Nyasaye Noyier Papa Bang’ Rafael Adika

21.     Ban’g jogi koro Nyasaye noyier ng’ama oneno. Anto akia. To ng’ama ok oluoro jogi to mach oluwe tiir nyaka nyikwaye.

Papa Thone Ema Golo E Kom

22.     Papa Mtakatifu thone ema gole e kom. Onge ng’at manyalo bet e koma kapod angima. To katho to Papa Timotheo (Atila) nitie.

23.     Ban’g Timotheo to Chiaji nitie; ban’g Chiaji to Rafael Otieno nitie.

24.     To aneno ka jomuyagi biro witou. Awinjo ni jomoko lamo mon moko ni mago Mama Maria (nikech muya owacho), to mano bende e kaka jok moko biro wuok ni ma e Baba Simeo Melkio kendo jok mang’eny biro luwogi.

25.     Kata mana Papa bende biro wuok mathoth. Kendo jok muneno achiegnigogi, mawawuothogogi, biro luwogi. Nyaka jok ma ondiko wechenagi biro luwogi nikech pesa.

26.     Gombo biro terogi e mach maok tho.

27.     Tan’guru kod jomuyagi. Nitie muya mabeyo kod muya maricho.

Puonj Simeo Melkio Kuom Rafael Adika, St Peter Manyatta, 1991

Saa 8:30 Otieno

Rafael Adika Nokaw Kar Wilson Owino

1.       An ang’eyo ni Kadnar Rafael Adika ma wuod Otieno en emobiro kawo kar Wilson Owino nikech aneno ka Owino owadwani ok en Ja Legion Maria.

2.       (Owino) oweyo chike mag Legion, otiyo kod “dikteta” (udikteta), to marani to onge dikteta. Ukabila bende onge.

3.       Aneno ka (Owino) tiyone bund iye. To moloyo nyaka nyocha oyanya marach Bardin’g, ok ayie kode.

4.       Ne owachona maler ni kata Lwanda Magere bende notho. Yawa donge mano en ayany koso? Kara donge en janek?

5.       Ero awinjo ka jomoko luonge (Rafael Adika) ni bradha, to apenjoni kara joma iwirogi donge gin bradha duto? Koso nitiere ng’ato mane ayudo ka Padri?

6.       Jaraten’g ofuwo. Nyasaye okelo gi maber to oloko oduwo mana e buru, kendo onyono gi tiende.

7.       Kata mana an Simeo Melkio, nene akuongo abedo bradha ei Katholik, eka bang’e abedo jatelo mar Misen.

8.       Ng’at matiyone Nyasaye koketo chunye, enie moyudo pok maber. Kata mana elweny kuma nene adhiyeno, tichni maber emomiyo imiyi telo.

9.       Omiyo weche ma ukelo kuoma mang’enygi ok adwargi. Otieno nitie, Kadnar Dean nitie eka Papa Mtakatifu bende nitie.

10.     Ka un kod wach nyaka kal kuomgi kendo nyaka chopie e kom Papa Mtakatifu, kapok okelna. To bende wach chopo mana e kom Papa Mtakatifu ka koro osetamo Kadinache losoe.

Adika En Kadnar Moromo Chuth

11.     Adika ma wuod Otieno to en Kadnar moromo chuth. Kata mana Daniel Osuri ni anyalo kata wire.

12.     To bende kata kaok awire to en kod teko mar chungo Bishop moseketho chik, kaka moko masero mondeji, Jodoho mopon’go Legion Maria kaegi, mago amiye thuolo ochunggi kabisa, kendo en jakom mar hedkuota mang’iyo kiye mag Kanisa.

13.     Ma emomiyo ne aluonge mondo oaye tije mar lweny obi okonya tich.

14.     Kata mana Ogando, Owenga, mago duto gin jootena, kendo gihera to an bende aherogi.

15.     To jok maluongo Otieno Adika ni bradha to gipar maber, gichayo Nyasaye.

Kadnar Adika En Kadnar Maduon’g

16.     Kadnar Otieno (Adika) en Kadnar maduon’g moriwo Kenya, Uganda, Tanzania; gikonyore kod Kadnar Dean.

17.     Kuonde machande (Kadnar Dean) to uloso kode eka bang’e utero ne Papa Mtakatifu.

18.     Papa Mtakatifu ento en ruoth, oyweyo ayweya mos to chiemo donjo, kendo tije en wuotho kopuonjo wach Nyasaye e pinje, to odhi mana kuma oluonge kod jotelo.

19.     Papa ok en ng’ama tho wuotho awuotha, bende irite maber.

20.     Ero awinjoni jo Mombasa obiro ka. Koro ok abi ndiko barua to abiro wuoyo mana gi dhoga nikech barupena to gichayo makata andiki to onge ng’ama winjo.

21.     Kadnar Otieno (Adika) en kod tije man’geny, gedo bende enie mogedo, kata mond liete gi nyithind kiye bende enie mopidho kae.

22.     Ka aorone kata jootena to omiyo pesa maber, samoro Elfu apar kod abich. Yawa, mano donge en jatich.

23.     Owino owadwani ento osechaye, en Nyasaye biro tieko wachne.

24.     To in Kadnar Dean, mak Kadnar Otieno mondo okonyi tich motegno.

Ruoth Ok Dwar Jodolo Ma Jodoho Gi Joser Mon

25.     Jodoho to ok adwar, gi joser mon kaka Ong’awo kod Alexus Ogola, gin to Nyasaye nonegi.

26.     Muga ni, ento en apuoyo, kik ukete etiendu. To kukete e tiendu to ok unukomie kodha. Nene oyako gigena Tanzania kendo sani oyuoro kae, tang’neuru.

27.     Piny to rach, ok aneno ka piny ber. Remo biro chuer e piny kendo ji biro tho ahinya. Lemo ema mondo obed man’geny.

28.     Jogena muchayo ni ok riekgi, magi emabiro konyou. Jootenagi ema mondo obed jooteu nyaka chopi githo.

29.     To ketho mar ng’ato ema mondo ogole, to mana koseyale moyudni oketho adier. To ok (gol) mar Ukabila, mano to adagi.

Chiemo Mondo Ochoki

30.     Jonathan Otieno to ohera ndi, omiya nyaka mtoka matinde amiyo Keya cha. To tich mane amiye mar Jakom Legion Maria piny mangima to aneno ka ok onyal, tijno otek.

31.     Kata kamano, Keya nitie biro kawo kareno. Keya bende en wuoyi chuth, oromogo, onge gima oreme kata achiel.

32.     Owenga mondo gichok cham giterna Jerusalem, Kodero, kata mana Manyatta, mondo nyithinda oyud chiemo.

33.     Bishobegi to tinde odong’ ne sero mon gi chamo pesana. Gin to mach noluw piergi tiir, motimo kamano.

Weche Gedo

34.     Ofis mane achako gero kata ng’ama konya onge, mana pesana mag mos ema agedogo to ofis to mar Legion Maria.

35.     Bishobe okwamo e pesa. Nyathi ma Maurice (Akelo) ema chandore kae gin kod Deacon Martin. Wuod Sewe ni ento osiko etienda kae. Komiya matin to apogo moko dhi e simiti to moko dhi e kuoyo, moko bende achamo.

36.     Od Mama Efeso e chande okwamo, ji odagi golo pesa.

37.     Jomoko wacho ni Maurice (Akelo) chamo pesa. Adier asedak kode higni mathoth to timbe mag chamo pesa to oonge go, bende pok aneno kuome, to bende kuma itiye ema ichieme.

38.     Kata wuod Sewe ni eri an kode kae, pok ochame pesana moro, pok aneno. Ka amiye ni okanna to okano maber kaka amiyeno.

39.     To nyathi Okodo ni ento en “over-all”, oriwo jogi duto. Enie motelonegi kata gichaye kamano, enie jatelo bende enie wang’a. Osekedo ka ong’iewo simiti migerogo ofis. Ka amiye (pesa) to oringo piyopiyo e duka.

40.     Wach ofis to adwaro keto e lwet Rafael Otieno, mondo ogo harambee maduon’g mondo otiekgo ofisno. En bende ofis mare ni kanyo, kohero ni oweye to wachne, en ma ibiro nyiere.

Jok Maricho

41.     Jok maricho maok adwar: ma Odhiambo Oluoch, omaya Trustee mara malit gin kod Muga, gin to ok adwargi. Bende nene anyisou ni ok adwargi.

42.     Ong’awo sero mana chiega ma Josephina Adhiambo, luokone nyaka “under” maiye, ento mach oluw piere tiir.

43.     Muga nene obiro wuonda kokelona kalatas mondo agoye sei, donge nene adagi. Odhiambo Oluoch to ok adwar, unto ero uhere nikech omiyou pesa kendo usero kode mon.

44.     Anto adage chuth, to kodwokona Trustee mara to aonge kode gi wach. To altach Nyasaye to kik onyon gi tiende.

45.     Kohero to odhi omadh kong’o, kong’o bende omadho pile. Ento en Jasiasa, obed abeda e siasa kuro, ng’ama dware mondo oluwe e bunge gidhi gimadh kode kong’o kuno. Jochiende orado kendgi.

46.     Okawo mon okinyi gi odhiambo to ni ok awachi, adagi. An kata ok omiya pesanego, nyithinda nitie pidha pile. Joma luwe ni koro omeu, wachgi.

47.     Unto oloyou. Kosemiyou pesa to koro uluwo mana piere.

48.     Ng’a madwaro mayi giri misechandorigo. Ogoya malit ne wach Legion Maria. Wuod Adera ni omuk lekene ne wach Legion Maria.

49.     Jachien en wuod achach, malaika to en wuod Nyasaye. Joma ohere oluwe gidhi kode e mach. An mano e wachna.