Tuesday, February 23, 2016

Puonj Simeo Melkio, St. Peter Manyatta, Kisumu, 31/7/1991


Legion Maria En Mar Bikra Maria

1.       Amoso jo Nairobi, Mombasa, Hola nyaka Ramisi, kendo amor kodu uduto.
2.       Nyasaye mochweyo polo gi piny ohero nyithinde to nyithinde to ok ohere, gi timo timbe ma mono maok owinjore ni Nyasaye.
3.       Legion Maria en mar Bikra Maria Mtakatifu kod wuode Jesus Kristus.
4.       Wan to wan chuothe motow mang’we.

Weuru siasa

5.       Akwayo jo Nairobi (Babilon) mondo otem matek kendo giwe siasa. To nono to piny nopuku oko kendo ok unukom e kodha.
6.       Rwakuru nyithinda ma aoronu mondo uyud hawi. Abraham gi Sara ne gi yudo hawi nade?

Lwenje Biro

7.       Ndalo biro ma lweny biro gore e piny; pinje ka pinje nolarre, ruodhi gi ruodhi nolarre kendgi, kendo remo nochuer ahinya; to lemo ema nokony piny. To ka onge lemo to remo biro medo chuer.
8.       An Simeo Melkio anto abiro tho. Ban’g higni apar kod achiel, abiro chiwo luth ni joma ocha, kendo anaket luth e lwet wuoyi ma pod tin ahinya.
9.       Ng’ato ka ng’ato opon’g kod wiye; piny gi polo norum to wachna to ok norum.

Jo Modak E Boma Oter Gig Gi Dala

10.     Awuoro ahinya jopiny masira, jorotenge molil kaka alilni.
11.     Yawuotwa matiyo Nairobi, ahombou, kowuru gigeu dala; onge gima iyudo kod kwe.
12.     Kata an nene akelo Legion Maria kod remo, kigoya malit ma otur kora; atin’go losruok u e jela; kaparo to litna.
13.     To ne akedo ne wach lemo kod loch marwa mar Kenya. Otweya Kapenguria; Shimo la Tewa.
14.     Jomo Kenyatta, Oginga Odinga, Kungu Karumba, Achien’g Oneko; mago yawuoyi mane okedo ne loch.
15.     Ka aweyo mago, ogoya e Legion Maria malit ahinya; sani awuotho kod mkebe.

Rwakuru Jootena

16.     Joote ma aoro tinde uriembo ariemba. Uyiero jou ma urwako to jok moko to uriembo e uteu.
17.     Rwakuru ji duto mondo uyud hawi.
18.     Heruru Jopadri magu kendo hergiuru kendo ukonygi.
19.     Bura mar abich mar Eklesia owacho ang’o? Ng’ama ok ohero Jadolo, gowi biro bet e wiyi.
20.     Weche mag miriambo ema mondo uwe, kendo uher jowadu duto. Hera oumo maricho; hera omuol, hera oler.

Jodolo Obed Jopuonj Mabeyo

21.     Jadolo mondo opuonj nyithinde morito maber; obed Padri ma jahera to kik obed Padri ma jachode, mano mach e giko.
22.     An nene akelo lemo mar hera, ok mar koko.
23.     Jo Nairobi duto, Kibera, Makongeni, Dandora, Kariobangi, Kawangware, kanise duto te; mondo ulem gi kwe gi hera duto te achiel.
24.     An Simeo Melkio ema aoronu wachna.

Jaotena

25.     Ang’eyo ni uchayo wachna to giko ni ubiro komo mana e kodha ni.
26.     Ero aoronu jaotena mondo okelnu wachnani. Urwake maber, umiye chiemo maber, kendo ukowe maber. Uminago Ksh 5,000 kende.
27.     Jaote ma aoro en Gombe. An’geyo ni uluonge ni janeko to en ema aore; kik ucha wachne.
28.     Adwaro ni mondo odwokna wach ni urwake maber.
29.     Nyasaye obed kodu higni gi higni.