Puonj Simeo Melkio Kuom Rafael Adika, St Peter Manyatta, 1991

Saa 8:30 Otieno

Rafael Adika Nokaw Kar Wilson Owino

1.       An ang’eyo ni Kadnar Rafael Adika ma wuod Otieno en emobiro kawo kar Wilson Owino nikech aneno ka Owino owadwani ok en Ja Legion Maria.

2.       (Owino) oweyo chike mag Legion, otiyo kod “dikteta” (udikteta), to marani to onge dikteta. Ukabila bende onge.

3.       Aneno ka (Owino) tiyone bund iye. To moloyo nyaka nyocha oyanya marach Bardin’g, ok ayie kode.

4.       Ne owachona maler ni kata Lwanda Magere bende notho. Yawa donge mano en ayany koso? Kara donge en janek?

5.       Ero awinjo ka jomoko luonge (Rafael Adika) ni bradha, to apenjoni kara joma iwirogi donge gin bradha duto? Koso nitiere ng’ato mane ayudo ka Padri?

6.       Jaraten’g ofuwo. Nyasaye okelo gi maber to oloko oduwo mana e buru, kendo onyono gi tiende.

7.       Kata mana an Simeo Melkio, nene akuongo abedo bradha ei Katholik, eka bang’e abedo jatelo mar Misen.

8.       Ng’at matiyone Nyasaye koketo chunye, enie moyudo pok maber. Kata mana elweny kuma nene adhiyeno, tichni maber emomiyo imiyi telo.

9.       Omiyo weche ma ukelo kuoma mang’enygi ok adwargi. Otieno nitie, Kadnar Dean nitie eka Papa Mtakatifu bende nitie.

10.     Ka un kod wach nyaka kal kuomgi kendo nyaka chopie e kom Papa Mtakatifu, kapok okelna. To bende wach chopo mana e kom Papa Mtakatifu ka koro osetamo Kadinache losoe.

Adika En Kadnar Moromo Chuth

11.     Adika ma wuod Otieno to en Kadnar moromo chuth. Kata mana Daniel Osuri ni anyalo kata wire.

12.     To bende kata kaok awire to en kod teko mar chungo Bishop moseketho chik, kaka moko masero mondeji, Jodoho mopon’go Legion Maria kaegi, mago amiye thuolo ochunggi kabisa, kendo en jakom mar hedkuota mang’iyo kiye mag Kanisa.

13.     Ma emomiyo ne aluonge mondo oaye tije mar lweny obi okonya tich.

14.     Kata mana Ogando, Owenga, mago duto gin jootena, kendo gihera to an bende aherogi.

15.     To jok maluongo Otieno Adika ni bradha to gipar maber, gichayo Nyasaye.

Kadnar Adika En Kadnar Maduon’g

16.     Kadnar Otieno (Adika) en Kadnar maduon’g moriwo Kenya, Uganda, Tanzania; gikonyore kod Kadnar Dean.

17.     Kuonde machande (Kadnar Dean) to uloso kode eka bang’e utero ne Papa Mtakatifu.

18.     Papa Mtakatifu ento en ruoth, oyweyo ayweya mos to chiemo donjo, kendo tije en wuotho kopuonjo wach Nyasaye e pinje, to odhi mana kuma oluonge kod jotelo.

19.     Papa ok en ng’ama tho wuotho awuotha, bende irite maber.

20.     Ero awinjoni jo Mombasa obiro ka. Koro ok abi ndiko barua to abiro wuoyo mana gi dhoga nikech barupena to gichayo makata andiki to onge ng’ama winjo.

21.     Kadnar Otieno (Adika) en kod tije man’geny, gedo bende enie mogedo, kata mond liete gi nyithind kiye bende enie mopidho kae.

22.     Ka aorone kata jootena to omiyo pesa maber, samoro Elfu apar kod abich. Yawa, mano donge en jatich.

23.     Owino owadwani ento osechaye, en Nyasaye biro tieko wachne.

24.     To in Kadnar Dean, mak Kadnar Otieno mondo okonyi tich motegno.

Ruoth Ok Dwar Jodolo Ma Jodoho Gi Joser Mon

25.     Jodoho to ok adwar, gi joser mon kaka Ong’awo kod Alexus Ogola, gin to Nyasaye nonegi.

26.     Muga ni, ento en apuoyo, kik ukete etiendu. To kukete e tiendu to ok unukomie kodha. Nene oyako gigena Tanzania kendo sani oyuoro kae, tang’neuru.

27.     Piny to rach, ok aneno ka piny ber. Remo biro chuer e piny kendo ji biro tho ahinya. Lemo ema mondo obed man’geny.

28.     Jogena muchayo ni ok riekgi, magi emabiro konyou. Jootenagi ema mondo obed jooteu nyaka chopi githo.

29.     To ketho mar ng’ato ema mondo ogole, to mana koseyale moyudni oketho adier. To ok (gol) mar Ukabila, mano to adagi.

Chiemo Mondo Ochoki

30.     Jonathan Otieno to ohera ndi, omiya nyaka mtoka matinde amiyo Keya cha. To tich mane amiye mar Jakom Legion Maria piny mangima to aneno ka ok onyal, tijno otek.

31.     Kata kamano, Keya nitie biro kawo kareno. Keya bende en wuoyi chuth, oromogo, onge gima oreme kata achiel.

32.     Owenga mondo gichok cham giterna Jerusalem, Kodero, kata mana Manyatta, mondo nyithinda oyud chiemo.

33.     Bishobegi to tinde odong’ ne sero mon gi chamo pesana. Gin to mach noluw piergi tiir, motimo kamano.

Weche Gedo

34.     Ofis mane achako gero kata ng’ama konya onge, mana pesana mag mos ema agedogo to ofis to mar Legion Maria.

35.     Bishobe okwamo e pesa. Nyathi ma Maurice (Akelo) ema chandore kae gin kod Deacon Martin. Wuod Sewe ni ento osiko etienda kae. Komiya matin to apogo moko dhi e simiti to moko dhi e kuoyo, moko bende achamo.

36.     Od Mama Efeso e chande okwamo, ji odagi golo pesa.

37.     Jomoko wacho ni Maurice (Akelo) chamo pesa. Adier asedak kode higni mathoth to timbe mag chamo pesa to oonge go, bende pok aneno kuome, to bende kuma itiye ema ichieme.

38.     Kata wuod Sewe ni eri an kode kae, pok ochame pesana moro, pok aneno. Ka amiye ni okanna to okano maber kaka amiyeno.

39.     To nyathi Okodo ni ento en “over-all”, oriwo jogi duto. Enie motelonegi kata gichaye kamano, enie jatelo bende enie wang’a. Osekedo ka ong’iewo simiti migerogo ofis. Ka amiye (pesa) to oringo piyopiyo e duka.

40.     Wach ofis to adwaro keto e lwet Rafael Otieno, mondo ogo harambee maduon’g mondo otiekgo ofisno. En bende ofis mare ni kanyo, kohero ni oweye to wachne, en ma ibiro nyiere.

Jok Maricho

41.     Jok maricho maok adwar: ma Odhiambo Oluoch, omaya Trustee mara malit gin kod Muga, gin to ok adwargi. Bende nene anyisou ni ok adwargi.

42.     Ong’awo sero mana chiega ma Josephina Adhiambo, luokone nyaka “under” maiye, ento mach oluw piere tiir.

43.     Muga nene obiro wuonda kokelona kalatas mondo agoye sei, donge nene adagi. Odhiambo Oluoch to ok adwar, unto ero uhere nikech omiyou pesa kendo usero kode mon.

44.     Anto adage chuth, to kodwokona Trustee mara to aonge kode gi wach. To altach Nyasaye to kik onyon gi tiende.

45.     Kohero to odhi omadh kong’o, kong’o bende omadho pile. Ento en Jasiasa, obed abeda e siasa kuro, ng’ama dware mondo oluwe e bunge gidhi gimadh kode kong’o kuno. Jochiende orado kendgi.

46.     Okawo mon okinyi gi odhiambo to ni ok awachi, adagi. An kata ok omiya pesanego, nyithinda nitie pidha pile. Joma luwe ni koro omeu, wachgi.

47.     Unto oloyou. Kosemiyou pesa to koro uluwo mana piere.

48.     Ng’a madwaro mayi giri misechandorigo. Ogoya malit ne wach Legion Maria. Wuod Adera ni omuk lekene ne wach Legion Maria.

49.     Jachien en wuod achach, malaika to en wuod Nyasaye. Joma ohere oluwe gidhi kode e mach. An mano e wachna.

Duond Simeo Melkio, Efeso Nzoia, 27/12/1990

Bikra Maria Bandho Sape

1.       Bikra Maria bandho sap chwechne Desemba tarik 8, obandha ahinya.

2.       Ka pod angima, kata ka asedhi, to sap Maria kik wich wilgo, utim.

3.       Kaka ndalogo ne ojahera, notin’go koda nyithind ji, nohero nyithi kiye kod nyithind joma odhier kod ma omeu, un bende nyiseuru herano.

4.       Maria wacho gi dhoge ni nene okonyo Nyasaye chweyo lope. Koro mondo wapak duon’g mar Bikra Maria.

5.       Owacho mondo water Katende kod Roseche man’geny ahinya.  Owacho ni kata kar tho, ter lembe man’geny ahinya.

6.       Gima Mama dwaro en ni mondo waluong nyinge seche duto.

7.       Jok maluwo ban’ge ok nobil tho (mar chuny) gi dhogi. To kain ema piny koru okinyi man’gich to iyanyoji, iterori, mano to ibiro chamo tho (mar chuny) gi dhogi.

Karilus Mumbo Odonjo E Polo

8.       Bed n’gama oluoro Nyasaye. Kristus dwaro dhande mondo gickokre kanyo achiel.

9.       To kiluoro Nyasaye to ibiro teri e polo kuma nyocha Mumbo (Karilus) odhie chande.

10.     To Nyasaye dwaro ni seche duto iluongo nyinge, in kode saa duto.

Mwandu Nyasaye En Dhano

11.     Dhano en Mwandu Nyasaye. Ma emomiyo ochuna ni dhi ipuonj Efeso, Imbo, kuonde duto. En ema onyisa kuonde ma adhiye.

12.     Anyisou pile pile ni mondo uluwre kode.

13.     Mogik, anwoyo ni sap Bikra Maria ogona koko pile pile mondo ulos sape. Ok kae kende to kamoro amora.

14.     Ulos sap chwechne maber.  Bende ung’oguru marichou kaka Maria Mtakatifu owacho.

15.     Mago kende. In Nomine Patris...

Puonj Simeo Melkio, Nazareth Mission, 27/11/1974

Tich Adek

Mwandu Kanisa Gin Mag Nyithi Nyasaye

1.       Gik moko duto mawango, Mwandu mar kanisa duto, gin e lwet n’gato achiel, ma en Nyasaye.

2.       Udi gi duto mawagero gin mag nyithind Nyasaye ma gidakie, maok giwuogi gidhi kamoro. Utego ema gidakie.

3.       Kata bed mana ni gin (utego) mana ei Kikuyu, (gin) duto mag nyithind Nyasaye.

Abraham Ka-Tera Kende Ema Nyalo Pogo Mwandu Legion Maria

4.       Ng’ato majapok manyalo pogo mwandugi, kata ka asetho, to mana Abraham (Katera) wuon, maonge ng’at moro.

5.       Ma ka aonge to Abraham wuon ema biro pogo gigagi, maokni Muya (Roho) owacho.

6.       Onge n’gato an’gata manyalo golo gikagi ni pogo ka aonge, to mak mana ka Abraham ema oa e polo.

7.       An irita kod Serikal man e polo, to ok ni Jo-Serikal man e pinyka.

8.       Serikal man e pinyka ok nyal rita, gin-agina osiepewa ma wachiemogo to an serikal moa e polo ema rita, kendo gin ema girito remba kod chunya.

Jok Modak Eklesia Nyaka N’ge Thuchegi

9.       Jotich modak Eklesia nyaka giwinjre. Thuchegi ma giaye bende nyaka ng’e. Kuonde ma giaye nyaka n’gere maler.

Ji Te Onego Osom Puonj Ruoth

10.     Jo Legion Maria duto te biro somo baruani, kata dhako kata nyithindo te manyiri, kata ma yawuoyi, nyaka some ma winj gik mandikogi te.

Gir Misen Ok Mar Ng’ato

11.     Kik ng’ato wuor (par) ni gir Misen en gire kende. Gir Misen en mar ji te, nyaka kata Serikal, ma gir Misen ok en mar n’gato achiel.

12.     Ma kata chiemo ka wanwan’go to ji chamo mana ji te.

13.     Jotich man e Kanisa mondo gipur puothe, onge bayo abaya oyuma.

14.     Ma ng’ama on’geyo ni tich ok odwar to ochak chon oa, to ng’at mon’geyo ni ji nyaka ti to rapur osik mana elwete ma kik owe rapur.

15.     Ma kata obed ng’at ma dhako kata dichwo, kata nyako kata wuoyi, nyaka opur mana matek. Ng’ama odagi to ochak mana chon oa.

16.     Dhako majabayo kech mako ode, to nyinge bende kethore to ok nying chuore.

17.     Onge ng’ama nyalo konyou tich, to utiyo mana uwegi. Kata kik ugal ni Serikal nyalo konyou pur. Un ema nyaka upur matek eka unyalo yudo chiemo.

Lemo Kod Siasa Nyaka Pogre

18.     Kata in mana jatelo mar Kanisa, onge ruhusa mar sando nyithindo matindo maluwo bang’i.

19.     To ka isando nyithindo matindo, to kare in bende owinjore osandi maok weyi.

20.     Ng’ato mosebedo mar Nyasaye en ng’ato maonge siasa. Jasiasa en Jasiasa, to Jalemo bende en mana Jalemo, maonge siasa.

21.     Ng’ato ma Ja-Serikal, en Ja-Serikal dichiel maok odonj kuma Jolemo nitie ni odhi sando Jolemo.

22.     Ja-Serikal onge gi ruhusa mar donjo kuma Jolemo nitie, nikech Jolemo gin Jolemo, to Jo-Serikal bende gin Jo-Serikal.

Winjo Wach Ber

23.     Luoruru buche Nyasaye. Bura mar an’gwen, iluor wuoru gi meru. Luor ema Nyasaye bende dwaro, ma nyaka to iluor gi.

24.     Ng’at moketho bura mar abich to ojanek, ojanek chuth.

25.     Ng’at mawinjo wach en ng’at maber, kata dhako kowinjo wach chuore to en dhako maber. To dhako maok winj wach chuore, ma ocha chuore, to ong’e maber ni ochomo mach.

Mon Modak Eklesia

26.     Mon modak Eklesia adwaro mondo wan’ge thuchegi te, ma moko mapok an’geyo thuchegi maber mondo ong’e thuchegi maber.

27.     Kaka mon moko an go ka ma ang’eyo thuchegi maber, kaka mane wuonegi omiya kod mane serikal mag polo omiya, ema ang’eyo thuchegi maber.

28.     To moko ma an godo ka ma akia thuchegi to mondo ong’e thuchegi.

29.     Jok man Eklesia onego ong’e thuchegi maber, kata obed nyako kata dichwo, nyaka ng’e thuchegi maber.

         

Duond Simeo Melkio, Jerusalem Amoyo, 2/8/1981

 Saa 8.45 Odichien’g, Jumapili

Mos 

1.       Kenya, Uganda, Tanzania, Ulaya, nyaka loka Misri, piny mangima, amosou duto tetete piny mangima.

2.       An Simeo Melkio ma omosou duto tetete.

Piny Abaluya

3.       Piny Abaluya Obera pod tiyo. En oti atiya e piny Abaluya, wabiro cheko wawegi piny Abaluya mondo wawinjie rach mantie.

4.       Buche mage ma uguro mondo olos piny maber? En mane gi mane ma uguro chuth mondo orit piny?

5.       Piny Abaluya bende nitie kech to ogunde adi ma usesolo e piny ngima ma utero kuro?

6.       Tich ma eyi piny Abaluya aparo ni mondo odhi ocheki mondi kod Kardinar Lawrence Chiaji kod jo Abaluya wegi. Odhi ocheki kod Kardinar mar piny mangima eka ban’ge Obera odhi kuro.

7.       Ywak n’geny e piny Abaluya.

Kuonde Michiwe Ordin

8.       N’ga manadi momiyo Abraham Ordin, japetrol Kisumu? N’gama omiyo Abraham Ordin en n’ga? Koso Nyasaye ema omiye?

9.       An nene achiwo kuonde adek ma ichiwe Ordin: Jerusalem Amoyo, Got Kalafare, kod Efeso Ukwala.

10.     To mana ka an ema agolo amri eka koro idhi ichiwo Ordin kuondego.

11.     To n’gama ochiwo Ordin ne Abraham mberere ochak chon ohulre. Nono to Nyasaye biro bandhe chunye.

12.     Ohulre mondo on’guonne odhi oywe dalane mos. Kaok kamano to n’gama ochiwo Ordin no biro bedogi midekre, obiro yware piny.

13.     To apenjo Kadnar Lawrende: In ema ichiwo thuolo mondo ochiw ordin oko kendo ong’iew kod pesa?

Akwede Ok Adwar

14.     An akwede ok adwar. Bende chokrruok ni an emane aluongoji mondo awuogo awuon mondo umiyae pesa gedo kod wach mtoka mara mar pigiot, mane omiyo jo Suna odwaro nega e wan’g yo madhi Kalafare, to kapok awuoyo kodu to un uchomo kanye?

15.     Adwarou e tiend Obolo. An emane aluongou.

16.     An awuon to pok awuoyo kodu to uchomo kanye un gi?

17.     Koso maruni dwaro chalo ma Raha ma ayany kende e mane ua godo?

Lemo gi Tich

18.     Wayalo to pesa igolo. Kata an sani abiro kod mia 100/=, abiro keto e nyimu sani mar gedo. Iwacho to igolo.

19.     Mokuongo mara awuon, maluor nyaka emabati. Mara awuon. To kaok kamano to un ema mondo unyisae gima datim.

20.     Kata Nazareth bende echande ochun’g, chal sigana. Omiyo adwaro wacho gigolo.

21.     N’gat manene oluongo burani ne en n’ga? Jalemo ok owach gimoro nono maok otim.

22.     Usechoko million adi moromo Jerusalem, Got Kalafare, Nazareth kod Nyamunda? Usechoko million adi?

23.     Koso akwede kende ema uhero? Usiko mana ni n’ganeni anene ok ober. N’ganeni anene ok ober, to into?

24.     Koko rach. Tegruok mautegreni, an’go kod an’go mauseketo e nyimu mondo uketie nyimwa?

25.     Pile pile uyalo pinje adi mausegero? Boro pod ok oger. Zeituni pok oger.

26.     Mbaka ma igoyo kaka mbak rawere ok adwar. Gouru mbaka madieri.

27.     Ka uguro chik ni ji ulourre, to dichiel. To ok ni ban’ge to weche moko chako tokea. Mago chalo timbe rawere. Ok adwar.