Tich Ariyo, Saa Auchiel
Odiechien’g
Luor mar kinde Misa
1. Ka Konsekrasio oselokore, onge ruhusa n’gato donj ei ot. Kata
obed Papa, kata obed Jahulo kaka an, onge ruhusa mondo odonj ei ot ka
Konsekrasio oselokore.
2. Jokristus duto gibed kod luor ka giluoro Sakramit mar Nyasaye.
Kik gi sud kod marach mar tho e chuny gi, to gi sud kod chuny maler.
3. Papa kaka jakwath kendo kaka Japuonj Jokristus duto, ma puonjo
wach dini achiel ma Jokristus duto oyie, ok onyal wuondowa ka en e Kom
Mtakatifu. To ka en oko onyalo wuondowa nikech Papa en dhano.
4. Konsekrasio en kinde ma makate kod divai lokore ringre Ruodhwa
gi rembe; makate kod divai gidoko ringre gi rembe gi chunye gi Nyasache.
5. (Ruodhwa) olor e dier Misa Mtakatifu tiir, e chuny altar, ka
padre wacho ni MA E RINGRA KENDO MA E REMBA. Mano saa Konsekrasio, dho Latin
luongo ni Consecratium.
Konyuru Padri
6. Padri ochiwore ne Nyasaye kendo oweyo dalagi. Ochiwo ngimane ni
Nyasaye.
7. Omiyo Jokristus nyaka gikony Padri ka gipogonegi gigi. Padri
mondo oluor ahinya nyaka gi Bishobe, Kadinache nyaka Papa. Nyaka jo-Diakon duto.
8. Jokristus duto oluor Padri eka unyalo chamo Sakramit ka chunyu
ler. To n’gat machamo Sakramit ka chunye okikre kod richo to oguro ruodhwa e
musalaba nyadiriyo, kochaye.
9. Yesus ogolore owuon e wi altar, kendo ng’ama igolo en Yesus
kogolore ni wuon e wi altar ka Padri somo Misa Mtakatifu.
10. Jokristus kik lew maok osudo pile-pile; Komunio en e tekre
dhano.
11. Jakristus kata otuo to nyaka ne ni omiye Komunio kuma otuoeno,
nikech onyalo gombo Komunio to tekre otame. Omiyo nyaka ter negi Komunio kuonde
ma gituoego, e Klisiache madongo koda matindo bende.
12. To ka dende ohewe ahinya, inyalo miye Komunio mar gombo nikech
onyalo gombo Komunio kod chunye.
N’gat Moloyo Nyasaye Gi Rieko
Onge
13. To Yesus ne owacho maber kane pod en e pinyni kane pok otho,
nowacho niya: chuny dhano nyap kaka ringre bende. Omiyo nowacho ni nyaka dhano
puonjre wach Nyasaye.
14. N’gat mariek kaka Yesus onge e pinyni. Nochweyo lowo (piny) gi
polo, kendo dhano bende ochweyo kod masinde e iye kod freje duto mag losruok.
15. To mar an’go in dhano ipiem kod Nyasaye? Nan’go? Nyasaye dwari
mondo ibed osiepne.
16. Kata iriek ma igik kanye to ok inirom kod Nyasaye ma ichwe dhano
man kod remo gi ringre, gi chunye bende. Ok ininyal; riekoni en rieko ma nono,
mar mach.
17. Dhano mariek ni, ok onyisie Nyasaye chakruok piny, kuma piny
dhiye, wiye ochiko kanye?
18. Kata nokwong oket an’go e bwo lowo eka lowo obedo motegno?
19. Yesus ne owacho ni en eyo to en e ngima, maonge n’gat ma nokadhe
kadhi ir wuon mare.
20. Kar chakruok Nyasaye ne nitie. Ne en e chuny pi; to chuny Nyasaye
ne otin’gore e wi pi. Koro Nyasaye nowacho niya: lowo ochokre kanyo achiel, a
lot gi yedhe bende obedie.
21. To Nyasaye ne ochweyo piny saa adi? Kata second adi? To lowo
duto nochokore saa adi? Mano e (penjo) ma apenjo piny duto.
22. Gima omiyo Nyasaye otuonou buombu un ji, en nikech dhano en ja
mirima.
23. Joma on’geyo ndiko duto tetete, mariek, gichak chueyo nyithindo
ei mon mondo wane mondo walamgi.
Nyasach Jok Mofuwo
24. To an ayie mana Yesus Kristus, mane oora e nyinge, ema alando
wachne. An dhano to ok analam nyaka chien’g, to n’gama odagi to bende owe.
25. To n’gat ma ofuwo ka an ema analaw ndache, kendo anakete buta.
Mano e rombo molal mane Wuora oora mondo abi amany.
26. Kendo an ne oora mondo anyon miere madongo kod matindo. Onge pogo
Kabila, kata in n’gama nade.
27. Kata ibed mana Msungu, kik ipog Kabila. Beduru joka dhano achiel
kaka chon dhako achiel e mane onyuolowa. Fupu ema omiyo upogo Kabila.
28. Nyasaye ne owacho ne pi: chokri kanyo achiel, wuothi kanyo
achiel. Nyaka aa kanyo pi ochokore kanyo achiel, kendo giwuotho kanyo achiel.
29. Piny bende ne ochweyo ka ochoko lowo kanyo achiel. Eka alode kod
yedhe ne otiye ma konyo nyithind Nyasaye.
30. Nyasaye bende ne ochweyo mach mapogo odiechien’g kod otieno.
Biro Wuod Dhano
31. Wuod dhano enobi kod kitwa kendo enochal kodwa; kendo wanachaye.
32. To enobi kod kit jorotenge, to ok non’ge.
33. Dho kalam mar Nyasaye ok oruchre kata matin.
34. Nyasaye ne omiyo winy hawi fuyo malo kendo gichiemo nono. Un
bende Nyasaye omiyou pi hawi (yath); nomiyou pi hawi maok rum, hawi mogik.
N’gama tuo okaw pi ochwaki omodhi—yath ero.
35. Jo Israel ne openjo Yesus niya: yaye ruoth, niduogi karan’go? To
bende inimiwa luth kendo?
36. To Yesus noduoko niya: luth ok namiyi to ateroni Wuoyi maduon’g
nimar kethruok piny ochiegni!
37. To piny nokethre ka luth nie lwet Wuoyi maduon’g, nikech dipo ka
oywak ni yaye piny kethore mana kapod ok ayudo luth. Omiyo loch to omiwa mana
mar loyowa kod bura.
38. Jowadwa, n’geuru ni seche n’geny, kendo paruru ndalo mane Yesus
otho godo e musalaba. To nochiko ni nowir (niduogi) ban’g wechegi. Mago kende.