Sunday, August 21, 2016

Simeo bi Imoswa, Gano kuom Simeo Melkio Part 3



Simeo ma wuonwa, wabiro iri, wagoyo chongwa piny;
Wan wakawo loo gi loo wariwo mondo wamiyi duon’g;
Wasudo buti mondo ipuonjwa, wayuoro mondo iguedhwa;
Wabiro iri mondo ijiwwa; waringo iri mondo ikonywa;
Japuonj wuog ipuonjwa; jajip wuog ijiwwa;
Jakony bi ikonywa; jarit wuog iritwa;
Rangie nyithindo duto mogoyo chonggi piny mondo iguedhgi;
Tin’g gi malo kuom lemo, medgi nema mar tiyoni kapod gi ngima;
Konywa, walem mayom e ng’uono Nyasaye. Amen.



Japuonj jorotenge, ma e tashbi mayande ne ikelonwa;
Ma e Rosari mayande ne ichiwonwa mondo wayuag godo marichowa;
Donge ma e simu mar polo mayande ne iweyonwa ka idhiyo;
Simeo koro wamako simu onogo mondo wapenji wach;
Jakonywa watin’go duondwa malo mondo wakwa konyruok kuomi;
Wuon gweth waringo iri mondo igwedhwa; wasayoi mondo iparwa;
Messiah chik iti mondo iwinjwa; bedie e komi mondo irangwa;
Kik ijwan’gwa Ohulo, kik iwe walem kendwa;
Winjwa ka waywak, gwedhwa ka wagoyo chongwa piny;
Miwa hawi, walem mayom e ng’uono Nyasaye. Amen.


Messia oyawore, wuon law abola oyawore;
Ohulo wuod min Dina yo, Agweny wuod Nyototo;
Wuog oko ipuonjwa, wuog ipuonj ogandani;
Donge ber mibergo emomiyo wagoyo chongwa piny;
Wan ok waromo paki, polo emon’geyo kaka ipako Manuel;
Wan joricho, to in iler mokalo;
Wan chwech-achwecha, remo gi pi gi choke;
Dhowa wacho maricho, to wan’gwa gawo mamono pile;
Pachwa opon’g gi maricho, to tiendwa terowa e mudho pile;
Wanok gi hera, ich lit okethowa;
Puonj otamowa luwo, to wiwa wil ka njiri;
Sama wan e mor wakiayi, wapondoni, wahepiga;
To into iherowa, ngima gi ber ema idwaronwa;
Morwa e morni, ngima mochwere ema ipuonjowa;
Ma emomiyo Ohulo, kik ijwan’gwa yawa;
Jadil bi idilwa, seche emoromo Simba;
Jachang bi ichangowa, johoch bi ihowa;
Ayaye Enure yo, kare ere Kingi;
Kare ilin’g nan’go, polo wacho an’go yawa;
Polo wacho an’go, polo gali gan’go ruodhwa;
Kare en wer mane ma polo wero ne ruodhwa;
Gidendi nade Ohulo, gilami nade ruodhwa;
Nimar wasemanyi Kiptoria, ok wayudi ruodhwa;
Kiblongoria wamanyie, to pok wayudo Kingi;
Wagoyo duondwa Ararat, Dume ok oduokowa;
Eka waoro ne Mama wach Silita, to pok wayudo duoko;
Wuon Legion yo Rakula, chung malo yawa;
Winjwa, walem mayom e ng’uono Simeo. Amen.


Simeo par ndalo, par ndalo koro;
Par ndalo kane in e dierwa, par ndalo yawa;
Par ndalo e tiend Obolo Jerusalem, par ndalo yawa;
Kipar ndalo kane ibedo e komi Nzoia Efeso, par ndalo ruodhwa;
Ne wabiro iri gichir, ne wan gi Nyasaye moromo;
Chandruokwa ne wakeloni, ka waywakni ga ni Baba konywa;
Ne ok ijwan’gowa, ne ichiko iti ne oganda tee;
Ka piny otwo, wakwayi koth; ka kech n’geny wakwayi yien’go;
Ka watuo ne ichangowa, nyithi skul ne kwayi rieko;
Jok modhier ne kwayi mwandu, jok mokwon’g ne kwayi hawi;
Jok motwe ne kwayi gony, jok mohir ne kwayi hos;
Wagumbni ne kwayi nyodo, mon madhodho ne kwayi rit;
Jodolo ne imiyo puonj, jonabi ne imiyo ote;
Omiyo par ndalo, wek lin’g gi ogandani;
Simeo ilin’g nan’go, Ohulo ilin’g nan’go;
Laurida kik ijwan’gwa, wuon Legion chik iti ne ogandani;
Nikech kijwan’gowa, chandruokwa water kanye?
Nikech ka lin’g alin’ga, n’ga mowinjwa wayud kanye?
Wapodho auma, wasayoi; bi winjwa Rakula yaye;
Wasayoi Ohulo, chung malo wuon orengo;
Messia moromo, Nyasaye moromo;
In kendi emiromonwa, Nyingi emochiwnwa;
Polo noyieri, polo ema noori kuomwa mondo ikonywa;
Jadolo winjie nyithindo koro, chik iti mondo ikonywa;
Miwa hawi, walem mayom e ng’uono Nyasaye, amen.


Simeo, nyithindo mayande niluongo opodho auma;
Nyithindo ywagore, nyithindo sayoi;
Yie iwinjwa, yie ikonywa ka waywak;
Nimar in e gonowa, in e konyruokwa;
Nyingi e tekrewa, badi e resruokwa;
Wachni ema yien’gowa, duondi morowa;
Puonjni ema jiwowa, to muchi ema changowa;
Tiend komi wayude gweth, tiponi to kowowa;
Sama ilimowa, wamor sidan’g;
Wahil-ahila; wathun’g gi mor;
Nikech sama ibiro, polo nikodwa tee;
Jopolo budhowa, jopolo puonjowa;
Ginyisowa yor ler, ginyisowa yor ng’uono;
Gitin’gowa malo, girwakowa e yor ngima;
Gichiko itgi, giwinjo ywak jorotenge;
Gikonyowa e lweny, gikonyowa e loyo jachien;
Emomiyo Ohulo, waluongi koro;
Bi ibudhwa, bi ipuonjwa; bi imoswa, bi iyawwa koro;
Winjwa, walem mayom e ng’uono Nyasaye. Amen.


Wuonwa Simeo waluongi mondo imoswa koro;
Japuonj jorotenge, saa oromo mar moso rombe;
To en an’go momiyo walemo to ilin’g alin’ga;
Ne wachako ka wapaki gi wende, to ruodhwa ilin’g alin’ga;
Ban’ge ne watero Katena ma walun’go, Nyasachwa pod olin’ga alin’ga;
Sani koro watieko Rosari to pod ilin’g-alin’ga;
Kare Baba wadendi nade mondo imoswa;
Nyasachwa wapaki nade mondo imoswa;
Nimar wan nyithindi wan’giyo gi puonjni;
Puonjni ema jiwowa, puonjni ema tegowa;
Miyo sama ilin’g-alin’ga, chunywa buok;
Waparore kionge, wakuyo kijwan’gowa;
Wuon Legion yo, chik iti mondo iwinjwa;
Par rombi, winjwa ka waywak;
Kaw lembwa, walem mayom e ng’uono Nyasaye. Amen.


Simeo ruodha, ruodh jorotenge;
Ambuor maraten’g, nam kore lach;
Ngero marangongo motamo pinje ng’eyo;
Nyasaye ka dhano, Nyasaye ka chwechne;
Wuon gikenyi mag polo, jachiw ngima mochwere;
Wuonwa yawuoyi gi nyiri mayande iluongo ogoyo chonggi piny;
Wabiro ir Enure, wabiro ir Hosea;
Fadha William Onyango yo, saa emoromo;
Osiep Fadha Chefa saa emoromo mar moso rombe;
Donge ma saa fanjili, saa mipuonje rombe;
Jafanjili man’gongo bi ipuonjwa;
Bi idhumie e korwa, wuog imose oganda;
Kare en an’go Ohulo, ilin’g nan’go Dume;
Simeo kiwinjwa, wuonwa kikonywa an’go;
Wuon Legion oyawore, Laurida oyawore;
Oyawore Simeo yo, oyawore Kingi;
Oyawore Hosea yo; oyawore Dume;
Lwanda joka Jakobo, kendo Lwanda Joka Esau bende;
Ruoth manosing ne Israel, kendo mosing ne oganda tee;
Jaluong jorochere, jawar jorotenge;
Ohulo ma Ja-Misri, Ohulo ma Ja-Kanaan be;
Donge in e ler mar piny, soko mar Neema;
Ohinga jorotenge, koko ma jochiende oluoro;
Tipo mawaponde, rabar mar masiche;
Jadolo ka Melkizedek, nyarombo makawo maricho mag piny;
Simeo ilin’g nan’go, Santa Maria ilin’g nan’go;
Kare ere Ohulo, kare ere Dume;
Japuonjwa koro ere, wuon Legion koro ere;
Laurida koro ere, Hosea koro ere;
Bi winjwa, bi ikaw lembwa koro;
Jadolo ma Kalafare yo, Simeo chik iti koro;
Jadolo ma Nazareth, Ohulo ruoth jorotenge;
Messia ilin’g nan’go, saa emoromo;
Ja Awasi Bethlehem, saa emoromo yawa;
Yaye Enure yo, saa emoromo;
Kare ilin’g nan’go, wuon law abola yaye;
Janabi ma Segegi, ki ikorie wach;
Japuonj Katkaism, bi ipuonjwa yawa;
Baba yo kik ikunwa; Jadolo kik ijwan’gwa yawa;
Winjwa, walem mayom e ng’uono Nyasaye, amen.