BIRO MAMA KOD BUCH POLO MAR TORENTE
1. An ne giluonga ni Maria. Ne an nyar Silita.
2. Ne an gi ndege moro; ndekani ne ringo matek ahinya.
3. Ne oringo mi okela ei kumoro e polo miluongo ni Paradiso.
4. Kane osekela Paradiso, ben mar Paradiso noywak mamit e seche mane aidho platform mar Paradiso—nikech Paradiso ne dwaro rwaka gi mor.
5. E sechego eka ndege mar Messia bende ne odonjo Paradiso, kendo oyudo ka ben mar Paradiso ywak; nikech Paradiso ne dwaro rwakowa gi mor.
6. Ndege mar Messiano, en neok obet e Paradiso—nikech en ndege ma donjo to wuok awuoka.
7. Kendo oringo matek ahinya nikech e sekend achiel en oringo mael 9,000. Ondik kor ndek Messiano ni “Jet Namba 9”.
8. To ka awachonu adieri, ndekego nitiere kodwa kae, ne wabiro kodgi e pinyka. Gin ndeke machal mag helikopta ma piyo kumoro amora.
9. Kane awuok ka abiro e piny, ne abiro kod oganda maduon’g mar jopolo. Nikech ndeka mane abiro godo ne oidhi kod jopolo kuom higni ochiko, ka ji idhe pilepile odiechien’g kod otieno.
10. Koro, e seche mane Messia wuok e Paradiso, ne okona niya: “In don’g irit kitabu, nyaka itia sei eka iwuogi.”
11. Sei ne onego aket kuom dweche ochiko kende, to ne okawa higni adek eka mondo atia sei.
12. Jodong polo mane wan godo e wuodha ne gin malaike Gabriel, Mikael, Rafael kod Latilati.
13. Latilati no en malaika ma huyo gi buombe piyopiyo; nikech e second achiel kende en ohuyo mael 10,000; buombe nikod teko moingo ndege.
14. Seche mane irwakowa Paradiso, mano ben mar Sayun pok oywak. Nikech kane awuok Silita, ne adhi Paradiso eka adhi Sayun—ma bende en kumoro e poloka.
15. To Paradiso e kuma nene adhi yale bura, kuma kweth maduon’g mar jopolo kod malaike ne oyuoro dhi neno lweny.
16. Mano emomiyo iwero wend paro lwenyno niya: “Oganda malaike ne jodhi yuoro lweny; lweny marwa mar Legion, alleluia wanalo lweny, gi teko mar Nyasaye.”
17. Eka ban’g kane atieko yalo bura, ne atin’go tawo gi remo, ma remo ne opukore kuoma.
18. Kane mano otimore, malaike ne ower niya: “Ruoth oparo an’go, koweyo tich kom duon’gne, ka odok e kit msumba, kokawo dhil kod masiche.”
19. Mano e wer mane malaike owero; kendo ema kane osewer to Latilati kane owinjo wer kower kamano, no owacho gi duol maduon’g niya: “Ooh, bura orumo!”
20. Eka Latilati ne owuok gi n’gwech kane oneno ka aseweyo kom duon’g mara mondo adog e kit msumba, ka aruako ogunia—ma en chuodho ma dhano luongo ni dende; rin’go, gi choke gi pi—kendo adhi idho ndege mondo adhi Sayun.
21. Kendo kane pok agik e ndege, kata oriti bende pok agoyo Paradiso, ne aoro wach Sayun e yor muya ka awacho niya: “An Maria nyar Silita, to abiro e bura Sayun nimar asetieko bura Paradiso.”
22. Bura ma Paradiso ne oyuare ahinya, kendo bura mane onego yal dweche ochiko ne oyal kuom higni adek; nikech chien’g bura ka chien’g bura ne ipenji mana wach achiel kendo kae to idok adoka.
23. Kane aseoro wach Sayun e kor muya, ne adonjo e ndege mondo adhi Sayun, nikech bura koro ne oserumo Paradiso.
24. Seche mane aidho ndege, polo ne okowa kod ben maywak kendo wer mamit, kendo maloso ka dhano.
25. Ne ben wer niya: “Paradiso oywe maler, Paradiso oywe maler.”
26. E sechego kane ben ywak kamano, Latilati ne ofuwo matek e kor polo kochomo Sayun; ne otelona mondo odhi oik oganda lweny man Sayun.
27. Ogendini mag lweny man Sayun ginie jogi: Jopadri, Jolevi, Jodiakon, Jonovina, kod ogendini mag Presidium.
28. Kane Latilati odonjo Sayun, ne obuogo ogendini man kuno ma okot mar Sayun majaywak dichiel e higa chien’gno ne onuoyo ywak.
29. Kendo kane okot oywak kamano, jolweny ma odak Sayun nowuok oko mar utegi ka gikirni, kendo kaok gitweyo matis, nimar okot mayuakga mana dichiel e higa ne onuoyo ywak.
30. Mi ne giwuok oko ka gipenjore niya, “En an’go? En wach manadi ma otimore?”
31. To okot ne omedo ywak, kendo ben mar Sayun ne ower niya: “Sayun oywe maler, Sayun oywe maler, malaike wer e Got.”
32. Malaika Mikael ema nodon’g koda e ndege, gin kod Gabriel kod Rafael.
33. Kendo kane ndekwa ringo e kor polo, Malaika Mikael nogoyo turbim mare mane engodo mondo onegodo Latilati e kor polo, kabende osechopo Sayun.
34. To Mikael neok oneno Latilati e kor polo, nikech ne oringo n’gwe lelo. Latilati en oringo moingo helikopta.
35. Jet mane aidho ne ringo mael 9,000 ban’g sekend achiel, to Latilati to ringo mael 10,000 e sekend achiel.
36. Malaika Latilati en jalweny mon’geyo lweny ahinya. Koro e seche mane olan’g mar Sayun ywakieno, ne oneno jachien ka bende goyo okot machielo mondo orochgo gigo mane timore Sayun.
37. Jachien ne goyo olan’g e piny machielo ma okiewo kod Sayun. Okot mar jachien ne ywak niya: “Higni gi higni, amen; higni gi higni, amen.”
38. Ka Latilati ne onene, ne oringo matek nyaka kuma ne jachien nitiere. Kendo ne omako jachien mi onyono piny gi tiende.
39. Kendo Latilati ne opado jachien kod pala mane en godo mar lweny, mi okwero jachien ni kik chak kel koko kendo.
40. Koro mano e kaka Latilati ne otelo dhi loso yora kuma ne adhi donjoe ei Sayun, ma en piny polo mokiewo kod Silita, kendo mokiewo kod Paradiso bende.
41. To an Maria ne aringo kuom dweche ochiko eka achopo Sayun, mano ka awuok Paradiso.
42. Mago duto bende ne otimore kane pok achopo kuma nene adhi goyoe oriti mogik ne jopolo eka mondo alor e pinyni.
43. Ei Sayun kuno, ogendini mag malaika ne hil kowinjo ni adhi kuno. Mi kane giromo ne Latilati, ne gipenje kuma Ruoth Manyako odon’gie, nimar ne girito mondo atia sei eka awuogi.
44. Sayun bende e kuma jopolo ne dhi goyonae oriti chuth ka alor e pinyni.
45. An Maria ne adonjo Sayun, kendo ne oromna kod oganda mag Sayun duto, kendo ben nower mamit Sayun niya: “Sayun oywe maler, Sayun oywe maler.”
46. Ban’ge, ka bura ma Sayun bende ne orumo, nikech en e bura ma ogik, koro wuoth ne ochiko pinyni mar abiriyoni.
47. Ndege mane abirogo ne oringo alanda mi nokalo piny Afrika.
48. To kane ochopo e piny machielo, eka ne awacho niya: “N’gan’g, pinyni ne asebire.” Mano ne wan e lwasi mar piny India. “Duoka mana e piny Afrika kocha.”
49. Eka ndeka ne oduoka e piny Afrika ma Ugwe, Wuok Chien’g, e dho nam Gumba (Viktoria), e piny Luo ma Milambo, ka wath Kanyamgondho.
50. Omiyo koro anyisou ni ndege moro biro ma enochok ji ka okelogi e Got Kalafare. Kendo ndegeno enochopi e kanise mag Legion Maria duto, kata mane osepodho.
51. Eka malaika nowuogi e ndegeno kendo enopenj niya: “Jo-Legion Maria man ka eke?” To jok ma onwan’go kanyo nokonegi niya: “Idhuru ndege.”
52. Kendo jogo duto moikore gi chik Presidium, kata man e mier oko, nowinj duond malaikano, kendo ginichop kanyo.
53. To jogo maok oikore ni Presidium, nobednigi matek, kendo ok ginichopi e ndegeno.
54. E kindego, Jo-Rasia nogo mbom ei piny, kendo giniket mbom e tunge piny duto.
55. Kendo mbom noneg ji mathoth ma e piny to gi gik moko mathoth man e piny yor Masawa kod Ugwe.
56. Kendo ji noywagre, kendo gik mangima notho.
57. Pinjego ji nothoe, kendo humbe lwenje ma Jo-Rasia kod nyithindegi nolandre e kor piny maonge kuma odon’g—to Got Kalfari ok ginigo kod mbom.
58. To e kindego, kata nibed mana n’gat molok e Legion Maria sano, kanoyudi ma maniidh ndegeno, ok initho.
59. Jo-Legion Maria nochoki duto ma noketgi ewi Kalfari, to modon’g maok ochoki, ginitho. To ndeke mag helikopta maga gi kende ema nodon’g e piny.