MARIA OK EN NYASAYE: BIKRA MARIA NE OPUONJO KOD DHOGE NIOK EN NYASAYE

 

Bikra Maria ok en Nyasaye. Nepok obedo Nyasaye. Ok nobed Nyasaye.

Mano ok tam dhano loso Maria moro mar pache kae ochako lamo. To Maria ma Min Jesus Kristus, kata mane okelo Legion Maria, ok mano. En nowacho wechegi maler, maber, ne jok mohero Nyasaye gi riekogi duto.

Gi dhoge, gi chuothe, ne owuoyo kuom Nyasaye. Magi e weche mane owacho, kendo mondiki e buge Legion Maria mag Fanjili.

 

1.            Maria owacho ni nitiere Wuoro Machiwo Osimbo

“An ema thuol ne okedo koda ka adwaro nyuolo Wuoyi. Wuoyi ni nomi jorotenge mag Afrika. En e ler Nyasaye gi duon’g ne. An ema anyono dwe e tienda kendo aruako wan’g chien’g. Osimbo ma Wuora ne omiya kendo osidhona, Sulwe apar gi Ariyo ema oluoro.”

 

Note: (i) Wuoyi e ler NYASAYE---kare nitiere Nyasaye

             (ii) Osimbo ma Wuora omiya—kare nitiere wuon mare momiye nyaka osimbo.

In miwacho ni Maria e Nyasaye Wuon, iselal. Ikiya wuon Osimbo moomiyo Maria Osimbo.

 

2.            Maria owacho ni teko te, nyaka malaike, gin mag Wuoro

 

“Neuru asenyuolo Wuoyi kendo Nyasacha oume gi duon’g ma thuol ok nomuonye! Enolo ruodhi mag piny duto gi odunga ma otin’go e lwete.

 

 Thuol malich no ne okedo koda ka muoch kaya, to Malaika mag Wuoro ne okedo matek mokonya.

 

Note: (i) Nyasacha oume...Kare nitiere Nyasach Maria...in mikiya Nyasach Maria iwile gi Maria, ilal.

(ii) Malaika mag Wuoro...Kare nitiere Wuon Malaike, ok en Maria, kata Maria ikonyo kod Malaike ka Wuon Malaike oyie.

 

3.            Maria bende kwayo mana Nyasach Kwerene

“Ma emomiyo ne adhi e nyim kom maduon’g ma e polo malo ir Wuora, ma en Nyasach kwerena ma kwereu.  Ne akwayo Nyasaye ma Nyasach Ibrahim, Isaka gi Jakobo mondo opar jaraten’g—jorotenge olal duto!”

“Ne akwayo mondo Wuoyi oduog opuonj piny Afrika, to kik chak chiwe e lwet jok maricho. Emmanuel ne okwer ni, ‘Ooyo mama, an ok anyal dok e pinyno!’ To ne ayuak ni jorotenge rumo e mach nan’go? Kare neok itho e musalaba nikech ji duto?   Wuoyi ne okona ni,’Mama, tel abiro ban’gi.”

 

Note: (i) Ir Wuora...Nitiere Nyasaye ma Wuon Maria bende, kikiya ilamo gik mikiya.

   (ii) Nyasach Kwerena....Wuoro no en Nyasach Kwere Maria. Kare Maria nikod anyuolane, nyaka kwerene. En dhano.

(iii) Nyasach Ibrahim, Isaka, koda Jakobo...Mano e Nyasaye...en e Nyasach Maria. Nyasaye no ok en Maria, en Nyasach Maria bende.

 

4.            Maria en Nyar Nyasaye, to Baba e Nyasaye mobiro Mineno, En Maria Saye

“Ji man’geny ne ogoya ka chwada ei Afrika, to Jaluo ne orwaka. Ma e hawi ma uyudo nikech ne urwako Nyar Nyasaye, kendo min Jawar mar dho od Israel.

 

Yie urwak Emmanuel to Unuyud gimoro amora. Jali ema otin’go duto ma aa kuom Jehova Nyasaye.  To wan’ge jalokore ka oneno richo. An ajagachne, to kada ni ok an to piny de orumo e ndaloni.

 

  Asayenu e lemba odiechien’g gi otieno maok anindi. Omiyo makuru jali gi lwetu ariyo.

En e Roho mar ngima, to en e dhano ma ineno ka Nyasaye. Siri mar Nyasaye ng’eyo tek—tan’guru un gi Ruoth!”

 

Note: (i) Ne Urwako Nyar Nyasaye...Kare nitiere Nyasaye ma Maria en Nyare.

(ii) Jehova Nyasaye...Kare Nyasaye no en achiel chande, nyinge Jehova, ok Maria.

(iii) An jagachne....Kare Maria nikod teko kuom Wuode, ogayenwa.

(iv) Aseyenu e lemba...Kare Maria bende lemo. Olamo n’ga? Nyasaye maok en. Okwanwa.

 

5.            Maria Luongo Ji e ode kuom teko Mar Nyasach Kwerene

“Ooyo! Oda aluonge ji kenda, kendo Wuora ma en Nyasach kwerena kendo Nyasach Jo-Israel ma gin anyuolana, kelona ji mowal kendo moyier ne ngima maokrum.”

(i)            Kendo Wuora...Maria nikod Wuon mare, Ma Nyasach kwerene, maok en. Yawa, winjo tek.

(ii)           Nyasach Jo-Israel, ma gin anyuolana...Kare Maria onyuol, kendo en gi anyuolane, gin Jo-Israel. En dhano man gi gunde, gi anyuolane.

 

 

6.            Maria Jachun’gnwa E Nyim Kom Nyasach Israel

“Un nyithinda, makuru Rosari gi Misa matek ka utweyo okanda. Saa ma gigi notimre noyud ka jawuond ma en aten’g-kristo nobed kochako tichne ratiro, kendo en bende noger ute mag lemo.

Noor ajenti mage ma nyiri kata machuo e kanise mag kanyakla mag jokristo, ma bende achun’g negi e nyim Nyasach Israel.”

Note: (i) Achun’g negi e nyim Nyasach Israel...wee! Maria karee n Jachun’g Marwa e nyim jal machielo, Nyasache, Nyasach kwerene, Nyasach Israel.

 

 

7.            Maria ochikoji mondo oyie Kuom Nyasaye Wuon

 

“Ndalogo masiche nobed man’geny ahinya. Gache noneg ji, to ma, nobed tich jachien. Tuoche madhero ji maok thiedhre nobi kendo noneg ji man’geny. Adhonde nomak ji maok changi.

  To n’gama oyie kuom Nyasaye gi Jesus Kristus ema piga mar hawi nochangi kolemo.

Messiah wuoda ema pod ogen’go nu jawuondno. To ka aseomo Messiah to jawuondno nobi mapiyo maok odeko.”

Note: (i) Ng’at ma Oyie Kuom Nyasaye...ok yie kuom Maria

(iii)         Kod Jesus Wuode...Ngeche wayie kuom Nyasaye Wuon, kod Nyasaye Wuoro.

 

 

8.            Maria odak e Polo kuma Iluongo ni Silita, opogore gi kar Kom Duong Didek Mtakatifu

 

“To sama ubiro neno ka Sulwe moro oringo marieny maler ahinya e polo to un’ge ni mano e ndekano.   Obiro oma otera Silita, to obiro duogo omo joga mane okela wuoth—podi awegi e piny gikonyo Oulo choko rombe.”

Note: Obiro oma otera Silita

“An ne giluonga ni Maria. Ne an nyar Silita.  Ne an gi ndege moro; ndekani ne ringo matek ahinya. Ne oringo mi okela ei kumoro e polo miluongo ni Paradiso. Kane osekela Paradiso, ben mar Paradiso noywak mamit e seche mane aidho platform mar Paradiso—nikech Paradiso ne dwaro rwaka gi mor.”

“An Maria nyar Silita, to abiro e bura Sayun nimar asetieko bura Paradiso.”

 

Note: Maria ok odak kuma kom duon’g mar Didek Mtakatifu nitiere e polo. Kodwaro romo kodgi, en wuoth. Ok en achiel kuomgi.

 

9.            Maria Jatich Nyasaye

Luke 1:38

“An jatich Ruoth, otimrena kaka iwachona

Note: Jatich ruoth mane? Kare nitiere Ruoth moro, maok Maria. Ruodhno en Nyasaye.

 

 

10.         Chuny Maria Puoyo Nyasaye

Luke 1:46-55

“Chunya puoyi Ruoth, Chunya osemor gi Nyasaye jawarna...”

Note: (i) Maria puoyo Ruoth

(ii) Maria mor kod Nyasaye...maok en Maria, to en Nyasaye majawar Maria bende.

 

Kiwinjo kumoro ni nitiere Maria moro mokawo kar Nyasaye, kendo modoko Nyasaye, tan’g ahinya.  Mano ok Bikira Maria, ma jatich Ruoth Nyasaye. Mano e kaka jachien nochakore, kobukore ni en be oromo alama.

An’go ma jachien kedogo e Legion Maria? Mondo kik walam Nyasaye. Kata Jesus Kristus ka Jachien teme, Satan nonyise wach lemo niya: “Ka igoyo chongi piny ma ilama.” Weyo lamo Nyasaye, kod lamo chwechne, kata nyiseche manono mag paro kod bau, kod gik maok Ruoth Jehova Nyasaye mar ogendini en dwach Satan malich ahinya.