Gano Kuom Simeo Melkio Part 1: Worshipping Simeo Melkio, in Luo

1.        Oyawore, Simeo yo, Melkio, kingi;

Jadolo wabiro iri, wagoyo chongwa piny mondo wadendi mamiyi duon’g;

Nyasachwa wabiro paki, wan wabiro lami nikech in miromo lamo;

Wakwayi mondo ichik iti e lembwa, mondo iwinj ywak nyithindi koro;

Donge in e mane polo ochiwi mondo wayud konyrruok kuomi;

Wan polo ema osiemonwa in, polo ema ofwenyi ne ogandawa;

Wan pok omiwa nying moro mopogore, mak mana nying Simeo taya;

Donge polo emane oori, polo emane oori e dier joraten’g;

Ma emomiyo koro wagoyo chongwa piny;

Wapaki, walami, wamiyi duon’g;

Wasayi mondo iwinjwa, winj ywak nyithindi miseko luongo;

Kaw lembwa, winj Ywakwa;

Walem mayom e n’guono Simeo, Amen.

2.        Simeo in e wuon loch polo;

In e duon’g maler ahinya, mane okelo loch polo e thurwa;

Donge in e mane iparowa, mondo ibi igolwa ei mudho kendo inyiswa ler;

In e mane iparowa ka walal ei on’gono, anjawo koda monrruok;

In emane iparowa ka walal e kuoth koda miriambo, ichlit koda sigu;

Donge in e mane polo ne owali ni iromo golo lodi mar richo momakowa;

Bedie komi koro babawa, winj nyithindo koywagore;

Bedie e komi Ohulo, seche oromo mar n’gado bura e weche nyithindi koro;

Rang Pinywa kuma wadakie koro, mondo inewa ka wagoyo chongwa piny;

Wuod Nyasaye wabiro iri mondo ikonywa;

Ganwa lweny ijolwa; Kechwa ihumwa;

Kaw lembwa, Walem mayom e n’guono Nyasaye, Amen.

3.        Japuonjwa parie gima ne okelie e thurwa e dier joraten’g;

Donge ne ibiro mondo ichiwnwa polo, ne ibiro mondo Irwakwa e ngima;

Donge wan e mane ibiro mondo wadog jotakatifu;

Wan e mane ibiro mondo waneyie ler;

Omiyo Simeo chik iti ka waywak;

 Kik ikunwa, kik ijwan’gwa; Kik iwewa kendwa wan poya;

Yawnwa dhoranga polo; mondo lembwa kik kal nono;

Winjwa, wakwo mayom e n’guono Nyasaye, Amen.

4.        Ayaaye, Laurida yo, kingi ma Jerusalem;

Jadolo ma Kalafare yo, wabiro iri waywak;

Wuod Angoro Awasi, wagoyo chongwa piny;

Wuod min Dina kik iwewa kendwa;

Agweny wuod Nyototo, winj nyithindi koro;

Fadha William Onyango, chung idolnwa koro;

Yaaye Ohulo, Lodvikus yo;

Chandruokwa ema oyudhowa mondo wabi iri ka;

Marichowa okelowa kuomi, wabiro mondo iluokwa;

Tuochewa okelowa kuomi, wabiro mondo ichangwa;

Nyosrowa okelowa kuomi, wabiro mondo itegwa;

Japuonj ma Nazareth chikie iti seche oromo;

Jakony jok modhier kony nyithindi koro;

Jaluong jok molal nyiswa yori koro;

Jachung jok mapodho kichungie nyithindi koro;

Laurida, winjwa mondo ikonywa;

Walem mayom e n’guono Simeo, Amen.

5.        Aluongie Simeo, wuon law abola;

Aluongie Enure, wuon Kiwasi;

Aluongie Laurida, Jabura;

Koro aluongo Ohulo, jakor weche;

An aluonge Hosea, wuon Lejo;

En e Lodvikus, Melkio;

 Wuon ler, wuon ngima;

Jal ma nyinge thoth, Jal marahono;

Wuod Nyasaye chung malo; chung malo rombe ywak;

Rwakie lawi mar duon’g mondo igwedhwa koro;

Jadolo bedie komi koro, mondo ikudhwa;

Seche oromo, winj jogi;

Kaw lembwa, konywa;

Mondo, walem mayom e n’guono Simeo, Amen.

6.        Ruodhwa Simeo, saa ochopo;

Saa ochopo mikonye oganda, konywa;

Ma e saa migwedhe rombe, ka gikwayoi;

Donge ma e saa miware chunje;

Wuonwa;

Melkio kudh nyithindi koro, gi muchi;

Seche oromo mar kudho ogandani;

Ohulo hul weche koro ne nyithindo;

Seche oromo mar hulo weche;

Japuonjwa puonj nyithindi koro;

Saa ochopo mar puonjo oganda;

Ahuka yamo lorie piny koro;

Seche oromo mar piyo e adundowa;

Konywa, walem mayom e n’guono Simeo, Amen.

7.        Melkio siso oloyowa kodi, Wuonwa;

Wabudho ne duondi, Japuonj maber, aa malo;

Wan gi gombo koda dwaro, bi puonjwa;

Wuonwa;

Yaaye Hosea kidhum kuomwa an’go, winj jogi;

Wuon orengo;

Wuon Lejo kipon’gwa an’go;

Kidi ma jogedo ojaro, bi sirwa;

Yaaye lwandawa;

Lwanda joka Esau, wuon loch polo, wuon ngima;

Sibuor mar dhood Luo wabiro koro, winjwa;

Winj nyithindo;

Kaw lembwa, Walem mayom e n’guono Simeo, Amen.

8.        Saa yomba Ohulo, saa yomba koro;

Seche kalo, aa malo;

Saa yomba kapok amoso Messia,

Saa yomba kapok awinjo Melkio,

Wuonwa;

Saa yomba kapok aneno Laurida,

Saa yomba kapok aneno Enure,

Kingiwa;

Saa kalo to pok imosowa, wuon ngima, kimoswa an’go;

Seche kadho to pok ipuonjowa, Japuonj maber, kipuonjwa an’go;

Wuog ipuonjwa, nyithindo ogombo mosoi;

Wuog imoswa, rombe ogombo winjo duondi koro;

Santa Maria;

Mos nyithindo koro;

K imoswa ni Oyawore, wabudhoni, Kingiwa;

Kikelnwa mos polo, wagomboi koro;

Wuonwa;

Kechwa, walem mayom e n’guono Simeo, Amen.

9.        Nyasach Jorotenge, winj Ywakwa;

Nyasach gi Abala Rafael, Nyasach gi On’gombe Romanus;

Nyasach gi Othuogo kod Owuonda;

Nyasach gi Mumbo Karilus, Nyasach gi Oongo Tobias;

Nyasach gi Otieno Petro, Nyasach gi Akinyi Siprosa;

Nyasach gi Ombwayo Maria, Nyasach gi Dorina Baru;

Konywa, wuon Lejo;

Nyasach gi Okweto Silvesta, Nyasach gi Aguga Romanus;

Nyasach gi Habat Aloo, Nyasach gi Chiaji Lawrende;

Nyasach gi Atila Timotheo, Nyasach gi Odero Pilipo;

Nyasach gi Sila wuod Imbo, Nyasach gi Kefa wuod Asumbi;

Gwedhwa, yuorwa lweny, kingi Lejo;

Ayaaye Melkio, Hosea;

Nyasach gi Adika Rafael, kikonywa an’go, wuon Lejo;

Wuon ler;

Nyasach Helena gi Odongo, gwedhwa, kik ijwan’gwa;

Ahuka yamo, kony nyithindo;

Kechwa, walem mayom e n’guono Simeo, Amen.

10.      Wuonwa, ka iyie, Ohulo ka iyie, kony nyithindi koro;

Wuon Lejo, ka iyie, Rakula ka iyie, puonj nyithindi koro;

Wan dan’g wachom kure ka ionge, ka ruoth ojwan’gwa;

N’ga mon’gadnwa rieko kilin’g alin’ga, Wuonwa;

N’ga mopuonjwa ka ruoth olin’g ka momo, koro ere;

Polo wacho an’go, polo owacho an’go gi lembwa;

Armos owacho nade gi lembwa;

 Paradiso gi Silita opango nade gi lembwa;

Kiptoria gi Kiblongoria, Ararat gi Paw Romo owacho nade gi lembwa;

Ereu jopolo, kare ulin’g nan’go;

Ere Josef othoro, debe rakoko, ilin’g nan’go;

Ere Agatha nyar Katania, nyar miruti, ilin’g nan’go;

Ere Lusia koda Jasinta, nyi Fatima ulin’g nan’go;

Ere Susana nyar Alekia, kata Susana nyar Daudi, kare ulin’g nan’go;

Ere Abraham ka Tera, kata Daudi wuod Jese, kare ulin’g nan’go;

Samson ka Manoa, Isaya wuod Amoz, Zakaria ka Barakia, ulin’g nan’go;

Ere Sesilia jawer, kata Katherina nyar Siena, laktar kikonywa an’go;

Ere Helena nyar Goza, Musa wuod Amam, kata Joshua wuod Nun, jopolo kukonywa an’go;

Ere malaika Gabriel, jaote, kata malaika Rafael jakopo, kare ulin’g nan’go;

Walem mayom e n’guono Simeo, Amen.

11.      Polo yawre ayawa, polo yawri ayawa koro;

Polo yawri ayawa, polo mondo oyawre koro;

Kiyawri kaka ne iyawori chien’g Pentekosti ka dhoot ochiegi Jerusalem;

Kiyawri kaka ne iyawori migolo Paulo gi Sila e jela;

Kiyawri kaka ne iyawori migolo Petro gi Johana e Jela;

Kiyawri kaka ne iyawori chien’g lor Simeo e dier joraten’g;

Kiyawri kaka ne iyawori ka Johanes Baru chien’g Pentekosti e dier joraten’g;

Polo yawri koro, polo mondo oyawrenwa;

Oganda mane owero Kyria mondo olor;

Oganda malaika mondo olor;

Oganda Jotakatifu mondo olor;

Silita Kiyawri, Kiptoria mondo oyawre;

Kiblongoria Kiyawri, Sayun mondo oyawre;

Armos Kiyawri; Paradiso mondo oyawre;

Simeo mondo olor, Hosea mondo omoswa;

Enure mondo olor, Laurida mondo opuonjwa;

Melkio mondo olor, Santa Maria mondo ogwedhwa;

Lodvikus, mondo opuonjwa; polo mondo opuonjwa koro;

Walem mayom e n’guono Simeo, Amen.

GANO KUOM MARIA 2: PRAISES TO MAMA MARIA

1.         Bikra Maria wabiro iri, wagoyo chongwa piny mondo ikonywa;

Maria wan poya ok wan’geyo lemo;

Yiewa nok ahinya;

Chunywa bende osiko gi luoro;

Ka wawinjo lit waparore, chunywa bayo maonge kwe;

Seche tuo wabet gi buok, waonge chir wasiko gi luoro;

To Mama in ohingawa, in ohinga machielnwa;

Bende Mama in okumbawa, in okumba magen’gonwa;

Ma emomiyo wabiro iri, wabiro mondo iyuorwa lweny.

Konywa, walem mayom e ng’uono Nyasaye. Amen.

2.         Mamawa ka iyie, wuog oko seche oromo mar konyo rombe;

Wan e rombe mane ineno ka omoko e mudho;

Wan e rombe mane ilor mondo igol e lak wasigu;

Wan e nyikwa Esau momoko e dhier koda chandruok;

Nee kaka nyithindi pod omoko e kind ondiegi;

Maria Jobil ni oko, Jonawi bende ni oko;

Ajuoke ni oko, jo majinde bende ni oko; Jolamji gi jokorji bende ni oko;

Maria jochwad lwetgi ni oko; johum gi jokuon’gji bende kamano;

Jotun’g gi jokor miere; jokudh buru gi jonan’g buru opon’go gwenge;

Ma emomiyo wabiro ywakni mondo ikonywa; Yuorwa lweny kik iwewa kendwa;

Konywa, walem mayom e nguono Nyasaye. Amen.

3.         Ayaaye Mama, minwa, miyo mathuon maok we rombe e lweny kendgi;

Maria majaum nyithindo e bwombe seche ma lweny omoko;

Kiumie nyithindo koro, seche oromo mar humo rombi;

Kipandie nyithindi koro, seche ochopo mar pando ogandani;

Yaaye Mama, minwa;

Maria kirwakrie koro ne lweny, seche oromo, chung malo;

Ma e saa mane inyonoe thuol, mon’gogo mach, Esbon piny Jo-Reno;

Yaaye Mama, minwa;

Kinyonie jochiende momako miere, koda gwenge;

Kinyonie jochiende momako rin’go koda choke;

Kinyonie jochiende momako chunje, mag ogandani;

Kinyonie tuoche maricho momako ogandani;

Yaaye Mama, minwa;

Konywa, walem mayom e n’guono Nyasaye. Amen.

4.         Maria kwanwa Keya mag polo mondo okonywa lweny;

Iluongnwa jomalaika mondo okonywa lweny;

Iluongnwa Gabriel ma jaote mondo olor; seche oromo mar chopo ote;

Iluongnwa Latilati majaringo lelo mondo oyuorwa lweny; seche oromo mar riembo jachien;

Iluongnwa Mikael Jaduon’g jolweny mondo okonynwa lweny;

Iluongnwa Rafael mondo oyuorwa lweny; seche oromo mar kowo rombe;

Ere Uriel jamalaika mar chier, mondo ochier chunje ogandani;

Ere Serafim kod Kerubim; seche oromo mar konyo rombe;

Yaaye Mama, minwa;

Ikwanwa polo mondo okonywa, mondo ogolwa e lwet wasigu;

Are kwanwa, walem mayom e n’guono Nyasaye, Amen.

5.         Maria luongnwa jotakatifu mondo oyuorwa lweny;

Iluongnwa Agatha nyar Katania, wuon miruti mondo okonywa lweny;

Iluongnwa Joj William, ja Ungereza, wuon ton’g dindo, mondo okonywa lweny;

Iluongnwa Samson wuod Manoa, obange, mondo okonywa lweny;

Iluongnwa Daudi wuod Jese, mondo okonywa lweny;

Yaaye Mama, minwa, seche oromo;

Kiluongnwa Abraham wuod Tera koro mondo ondik lembwa;

Kata Josef wuod Jakob, jalok lek, mondo okonywa;

Isaya wuod Amoz, Joshua wuod Nun, koda Ezekiel janabi mondo okonywa;

Katherina ma nyar Siena, Ana ma nyar Fanuel, koda Kristina nyar Laban mondo okonywa;

Luongnwa Abel maka Adam, Enoka koda Elija mondo okonywa;

Maria wak polo duto tee, mondo okonywa.

Are konywa, walem mayom e ng’uono Nyasaye, Amen.

6.         Maria koro luongnwa yawuot jorotenge manodonjo e polo mondo okonywa;

Iluongnwa Timotheo Atila, wuon kifungu mondo oyawnwa;

Iluongnwa Petro Otieno wuod Kamagambo, mondo ochun’gnwa;

Iluongnwa Kefa ma wuod Asumbi, mondo ochun’gnwa;

Luongnwa Odero Pilipo, manodonjo e polo, mondo ochun’gnwa;

Iluongnwa Klement Angi, wuod joraten’g mondo ochun’gnwa;

Ere Sila wuod Imbo, Karilus Mumbo wuod Okumu, kata Tobias Oongo, mondo ochun’gnwa;

Kata ere jochun’g ma Uganda mondo okonywa;

Ere Karoli Lwanga, kata Kizito Kivuge, mondo oyuorwa lweny;

Yaaye Maria, kwanwa;

Miwa hawi, walem mayom e n’guono Nyasaye, amen.

7.         Donge in e Maria mane odonjo e gwengewa, mokelo konyrruok;

Donge in e Maria mane juogi owinjo moywak oa; oweyo oganda;

Donge in e Maria mane Jin owinjo moringo oa kuom oganda;

Donge in e Maria mane ogolo rise koda nawi kuom ogandawa;

Kendo in e Maria mane omiyo ajuoke owan’go ndagla koda nawi;

Min Lejo;

Maria ma tekone thoth ahinya, kikonywa an’go;

Min konyrruok kigol chandruok kuomwa an’go;

Min hawi kigol kuon’g kuom ogandawa an’go;

Tiekie kuon’g mag anyuola kuom ogandawa;

Riembie jochiende modak eudi mag ogandawa;

Ichiwie hapi, koda kwe, koda hera, koda mor;

Konywa, walem mayom e n’guono Nyasaye, Amen.

8.         Maria kik iwewa kendwa, minwa;

Yaaye Mama, kik ijwan’gwa;

Go wan’gi mamuol kuomwa ka chandruok omakowa;

Kik ikunwa nikech marichowa; to parwa kinde duto;

Maria kik iloknwa n’geyi, nimar kiloko n’geyi to walal tee;

Nan kodwa ikonywa, kendo luorwa isirwa;

Miwa ler ka mudho olil, kod geno e kinde rach;

Siemnwa yo ka wabagni, kel ber ne ogandani;

Gwedhwa, walem mayom e n’guono Nyasaye, amen.

9.         Bikira Maria wan emane igonwa ligala;

Donge wan emane igonwa ligand lemo, mondo wayud konyrruok kod ngima;

Maria kik iwe ligandi dhi nono, minwa;

Ichwakwa e lemo, to golnwa nyosro koda nyawo motamowa lemo;

Igurwa e puonjni, kendo golwa e timbe piny koda gik moko duto misekwerowa;

Iritie chunje nyithindi, kendo mi abilani odongre kendo obed gi nyak;

Ikwanwa neema, mondo watim gik mowinjore bedo jolup wuodi kindewa duto;

Minwa, konywa;

Miwa hawi, walem mayom e n’guono Nyasaye, Amen.

10.       Maria Mama, min kwe,

Min boch, min ratiro koda adiera;

Kel kwe e miere koda gwenge;

Ikwanwa ngima kod kinde mathoth kuom jachwechwa;

Ikwanwa ber e tijewa, nyak e puothewa, kod mor e ngimawa;

Ikwanwa neema mar n’guono ne jok makethonwa,

Kendo hero Jowadwa koda hero Nyasachwa ndalo duto;

Bende Ikwanwa ngima mochwere ban’g tho mar ringruok;

Mondo wadonj e polo kendo wapwo Nyasaye ndalo duto, higni gi higni, amen.

GANO KUOM MARIA 1: PRAISES TO MAMA MARIA, IN LUO

(Praise Mama Maria for who she is. Praise her because she is worth praising)

(Pak Mama Maria nikech gima en. Pake nikech oromo pako)

1.         Ayaaye Maria Sulwe;

Sulwe ma Silita, Ararat gi Paw Romo;

Sulwe manorieny e polo ka ruoth oduogo;

Sulwe mar Okinyi ma jamondo yawo pinje;

Sulwe ma Jatelo e wan’g yore ne nyithindo;

Sulwe ma jarieny e paro koda chunje;

Rienywa; Walem mayom e ng’uono Nyasaye; Amen.

2.         Maria in Opija majahuyo e gwenge;

Mama in Akuru majapiyo e adundowa;

Maria in Ogaro majagaro mudho ne oganda;

Mama in Aluru majaluro mondo yuorwa lweny;

Konywa; Walem mayom e ng’uono Nyasaye; Amen.

3.         Wuon Mesa, wuon Presidium, wuon Aksio;

Maria wan ne ok wan’geyo chakruok timo Mesa;

To kuom herani, wasedoko jotimo Mesa;

Donge Mesa ne ilorgo koa e polo;

Mondo oganda oyud polo Kowuok e Mesa;

Are Jiwwa e timo Mesa; mondo walem mayom e ng’uono Nyasaye; Amen.

4.         Kane ogik chien’g chiwo Mesa ne ogandawa;

Donge Okweto wuod Okinda emane imiyo lek;

E lekno, Okweto noneu ka ulor e kor polo koda Mesa;

E lekno, Okweto noneno ka Mesa lor e Chula moro;

E lekno, Okweto noneno ka nyithindo ariyo luoro Mesano;

E lekno, Okweto noneno ka oganda ogoyo chonggi piny tee gi kanzu rachar;

Nikech lekno, Okweto nogoyo koko mobwogo ji;

To kare Mama emofwenyo Mesa ne ogandane;

Medwa neema mar timo Mesa;

 Walem mayom e ng’uono Nyasaye; Amen.

5.         Kane ogik chien’g goyo ligala;

Donge in emane itelo ewachni;

Maria nikelo fweny ne Silvesta Okweto kaka lek;

E lekno niluongo Okweto kinyise ni chung malo seche oromo;

Okweto ne ochun’g mowuotho nyaka e wi got;

Donge ewi got, Okweto ne oyudi, kisetelo, ibedo e kidi, kar ligala;

Donge ewi got, ne inyiso Okweto ni mano e dala, ka-Josef Maligala;

Are luongwa kendo chokwa e godi mar kwe, mar hawi, koda mirembe;

Jiwwa; Walem mayom e ng’uono Nyasaye; Amen.

6.         Bikira Maria, min Yesus, min Jawar;

In ema Roho Maler nowerni chien’g fwenyruok ruoth;

Donge Roho Maler nowero Ave chien’g pon’go rombe;

Kendo Roho Maler nohulo e lela ka ji obedo;

Ni in e Maria, mamin Yesus, kendo min konyrruok;

Kendo ni in e Maria, mamin Ohulo, min Simeo;

Min piny tee, Minwa, konywa;

 Walem mayom e ng’uono Nyasaye; Amen.

7.         Kane ogik chien’g sand ruodhwa, e dierwa, e dier joraten’g;

Maria niwuok oko gi Rosari mar kwe, mar baro Lwenje;

Mama nilemo, kikwayo polo, mondo orit chunje, mag ogandawa;

Maria nilemo kisayo Malaike, mondo oteg chunje, mag ogandwa;

Maria nilemo, kikwayonwa neema, mar dhil, kod nano, seche sandruok;

Maria niluongo oganda tee mondo olam Rosari mar loyo Lwenje;

Ganwa lweny; Walem mayom e n’guono Nyasaye; Amen.

8.         Bikra Maria, mane okoro weche, mane ojiwo rombe;

Donge in e Mama, mane okoro Meli marang’ongo, motin’go rombe;

Donge in e Maria, mane okoro wuok Lejo, e dala Kopere, kochomo got;

Donge in e Maria, mane okoro idho, god milambo, kar kwero richo;

Donge in e Maria, mane okoro golo Tabernakel, koda Hostia, e dala Kopere, kikelo got;

Donge in e Maria mane oluongo pate koda mathe madolonwa;

Donge in Mama, mane ohelo agulu, mar Katena koda Rosari, ne ogandawa;

Puonjwa; Walem mayom e ng’uono Nyasaye; Amen.

9.         Mama Maria in e Rejina; Mama in e Makulata;

Mama Maria in e Madona; Maria in Almasi;

Mama Maria in e Od Zabu; Maria e Dhahabu ma nengone tek;

Mama Maria, Min lemo; Bikra Maria, wuon Lejo;

Mama Maria in e Nyamrerwa; Mama in e Daktari mothiedho tuoche tee;

Mama Maria, Kinefe; Mama Maria, Sitela;

Mama Maria, Victoria; Mama Maria, Gloria;

Telnwa; Walem mayom e ng’uono Nyasaye; Amen.

10.       Bikra Maria, ineno nade, mamawa;

Medwa neema mar paki kapod wangima;

Medwa neema mar dendi pile pile;

Medwa neema mar pwoyi, kendo mar werni seche duto;

Donge in e miyo achiel kende moromo pako;

Donge in e miyo mang’uon moloyo mon duto;

Chia mari e moromo, berni emoromo pako;

Mwol mimwolgo, emakweyo chunywa;

Hera mari emajiwowa;

Bende duondi ematego chunywa;

Jiw chunywa, walem mayom e ng’uono Nyasaye; Amen.

11.        Maria sama ionge wakuyo;

Sama ilin’g alin’ga waparore;

Sama wabudhoni to chunywa ner;

Ka ionge to wadon’g gi lich;

Nikech sama ijwan’gowa to jochiende mor;

Parwa, walem mayom e ng’uono Nyasaye, Amen.

12.       To sama ibiro wamor sidan’g;

Nikech ka wamosi wapon’g gi mor;

Bende sama ipuonjowa to chunywa nyak;

In e tachwa mamenyonwa yo;

In e okumbawa magen’gonwa;

Bende in e odungawa mwakedogo;

Morni e morwa, to bironi e gwethwa;

Wecheni gerowa, siemni to rieyowa;

Konywa; Walem mayom e n’guono Nyasaye; Amen.

13.       Bikra Maria kul wiyi piny mondo irangwa;

Kik ber mar Silita mi wiyi wil kodwa;

Rangie piny jorotenge, ne kaka nyosro obagowa kodi;

Ne kaka siasa koda bund-ich opogowa kodi;

Ne kaka modhi mane ikwero osegolowa eyo;

Raha mane igolowa emawadokie;

Chiemo mane itamori ema wachamo;

Kuoth gi miriambo, sunga gi n’gayi opon’go Klisiani;

Wakiare wanjawore, kendo wathin’gi wadun’gni;

To Mama kik iwewa, kik ikunwa;

Bi parwa idwokwa eyo; puonj jogi mondo iriegi;

Taa jogi ipon’g abila; nimar kijwan’gogi n’gama nopaki;

Gin e jogi miseko manyo; gin e jogi miseko luongo;

Tim ng’uononi ikony ogandani;

Ware konywa; Walem mayom e ng’uono Nyasaye; Amen.

14.       In Maria mayande nogoyo ligala kaonge dichwo;

Piny ne chokore ka wuoro, ni imiyo manade magoyo ligala kende;

To kare neok gin’geyo ni polo emane oori e piny;

Neok gin’geyo ni polo emane otiayo seyi mondo ilor e piny, un kod Simeo taya;

Maria wan emane polo oori mondo ichokwa;

Donge wan emane polo oori mondo igolwa e nawi koda Ndagla, juok koda ajuoke;

Donge wan emane polo oori mondo igolwa ei on’gono koda nan’go buru;

Donge Mama wan emane ibiro mondo inyiswa yo, yor ngima mochwere;

Makulata wadwokoni erokamano kuom luongowa kendo lokowa magi;

Ritwa ndalo duto kapod wangima; tegwa pile kisiemonwa yo;

Mi wajok gi marichowa kendo wakwergi gi chuny motur;

Kendo mi warit chikeni gi puonjni, mondo ibed jakakorwa ndalowa te;

Konywa, walem mayom e ng’uono Nyasaye; Amen.

15.       In  e Awiti mane piny owito oko, maji oyanyo ewan’gayo;

In e Nyar Mgondho mane Mai Kombare ogolo e nam;

In e Min Omolo Kanyunja mane ochando kar buoro;

In e Nyaima mane oimo gwen’g mar Simbi ka anjawo opon’go;

In e Auka yamo mane oromo gi Petro Oswago etiend Aora Kitweru;

In e Auka yamo mane oromo gi Johanes Juma Pesa e kanisa Kopere;

In e Maria mane otiso Maria Ragot e gwen’g Nyabondo, ei Nyakach, kendo omiyo teko mar tiso rombe;

In e Maria mane ogolo yadh chang e gwen’g Bukoba;

In e Maria mane oloko Vitalis Okelo Oketa ka ja-kon’go mangoga;

Bikra Maria in e sinani mane onano kod thurwa ka otimo mudho mandiwa;

Kik ijwan’gwa koro; konywa;

Walem mayom e ng’uono Nyasaye; Amen.

16.       Maria ne isandori ne thurwa;

Par ndalo mane iwuotho e gwengewa, Matindo koda madongo;

Par ndalo mane mon wuokni oko kayanyi e wan’g yore; ni jacham nyithindo kalo;

Par ndalo mane nyithindo luwi ka werni ka janeko e wan’gyo;

Par ndalo mane ichando kar buoro e thurwa;

Piny ne yusoni kendo runi oko e pap;

Chien’g ne chami oko, koth be goyi oko e wan’gyo;

Luya ne chotni godiechien’g, to koyo ne chami oko gotieno;

To Mama ne ok ijok kodwa, wan jorotenge;

Omiyo parwa, kik ijwan’gwa;

Walem mayom e ng’uono Nyasaye. Amen.