GANO KUOM MARIA 1: PRAISES TO MAMA MARIA, IN LUO

(Praise Mama Maria for who she is. Praise her because she is worth praising)

(Pak Mama Maria nikech gima en. Pake nikech oromo pako)

1.         Ayaaye Maria Sulwe;

Sulwe ma Silita, Ararat gi Paw Romo;

Sulwe manorieny e polo ka ruoth oduogo;

Sulwe mar Okinyi ma jamondo yawo pinje;

Sulwe ma Jatelo e wan’g yore ne nyithindo;

Sulwe ma jarieny e paro koda chunje;

Rienywa; Walem mayom e ng’uono Nyasaye; Amen.

2.         Maria in Opija majahuyo e gwenge;

Mama in Akuru majapiyo e adundowa;

Maria in Ogaro majagaro mudho ne oganda;

Mama in Aluru majaluro mondo yuorwa lweny;

Konywa; Walem mayom e ng’uono Nyasaye; Amen.

3.         Wuon Mesa, wuon Presidium, wuon Aksio;

Maria wan ne ok wan’geyo chakruok timo Mesa;

To kuom herani, wasedoko jotimo Mesa;

Donge Mesa ne ilorgo koa e polo;

Mondo oganda oyud polo Kowuok e Mesa;

Are Jiwwa e timo Mesa; mondo walem mayom e ng’uono Nyasaye; Amen.

4.         Kane ogik chien’g chiwo Mesa ne ogandawa;

Donge Okweto wuod Okinda emane imiyo lek;

E lekno, Okweto noneu ka ulor e kor polo koda Mesa;

E lekno, Okweto noneno ka Mesa lor e Chula moro;

E lekno, Okweto noneno ka nyithindo ariyo luoro Mesano;

E lekno, Okweto noneno ka oganda ogoyo chonggi piny tee gi kanzu rachar;

Nikech lekno, Okweto nogoyo koko mobwogo ji;

To kare Mama emofwenyo Mesa ne ogandane;

Medwa neema mar timo Mesa;

 Walem mayom e ng’uono Nyasaye; Amen.

5.         Kane ogik chien’g goyo ligala;

Donge in emane itelo ewachni;

Maria nikelo fweny ne Silvesta Okweto kaka lek;

E lekno niluongo Okweto kinyise ni chung malo seche oromo;

Okweto ne ochun’g mowuotho nyaka e wi got;

Donge ewi got, Okweto ne oyudi, kisetelo, ibedo e kidi, kar ligala;

Donge ewi got, ne inyiso Okweto ni mano e dala, ka-Josef Maligala;

Are luongwa kendo chokwa e godi mar kwe, mar hawi, koda mirembe;

Jiwwa; Walem mayom e ng’uono Nyasaye; Amen.

6.         Bikira Maria, min Yesus, min Jawar;

In ema Roho Maler nowerni chien’g fwenyruok ruoth;

Donge Roho Maler nowero Ave chien’g pon’go rombe;

Kendo Roho Maler nohulo e lela ka ji obedo;

Ni in e Maria, mamin Yesus, kendo min konyrruok;

Kendo ni in e Maria, mamin Ohulo, min Simeo;

Min piny tee, Minwa, konywa;

 Walem mayom e ng’uono Nyasaye; Amen.

7.         Kane ogik chien’g sand ruodhwa, e dierwa, e dier joraten’g;

Maria niwuok oko gi Rosari mar kwe, mar baro Lwenje;

Mama nilemo, kikwayo polo, mondo orit chunje, mag ogandawa;

Maria nilemo kisayo Malaike, mondo oteg chunje, mag ogandwa;

Maria nilemo, kikwayonwa neema, mar dhil, kod nano, seche sandruok;

Maria niluongo oganda tee mondo olam Rosari mar loyo Lwenje;

Ganwa lweny; Walem mayom e n’guono Nyasaye; Amen.

8.         Bikra Maria, mane okoro weche, mane ojiwo rombe;

Donge in e Mama, mane okoro Meli marang’ongo, motin’go rombe;

Donge in e Maria, mane okoro wuok Lejo, e dala Kopere, kochomo got;

Donge in e Maria, mane okoro idho, god milambo, kar kwero richo;

Donge in e Maria, mane okoro golo Tabernakel, koda Hostia, e dala Kopere, kikelo got;

Donge in e Maria mane oluongo pate koda mathe madolonwa;

Donge in Mama, mane ohelo agulu, mar Katena koda Rosari, ne ogandawa;

Puonjwa; Walem mayom e ng’uono Nyasaye; Amen.

9.         Mama Maria in e Rejina; Mama in e Makulata;

Mama Maria in e Madona; Maria in Almasi;

Mama Maria in e Od Zabu; Maria e Dhahabu ma nengone tek;

Mama Maria, Min lemo; Bikra Maria, wuon Lejo;

Mama Maria in e Nyamrerwa; Mama in e Daktari mothiedho tuoche tee;

Mama Maria, Kinefe; Mama Maria, Sitela;

Mama Maria, Victoria; Mama Maria, Gloria;

Telnwa; Walem mayom e ng’uono Nyasaye; Amen.

10.       Bikra Maria, ineno nade, mamawa;

Medwa neema mar paki kapod wangima;

Medwa neema mar dendi pile pile;

Medwa neema mar pwoyi, kendo mar werni seche duto;

Donge in e miyo achiel kende moromo pako;

Donge in e miyo mang’uon moloyo mon duto;

Chia mari e moromo, berni emoromo pako;

Mwol mimwolgo, emakweyo chunywa;

Hera mari emajiwowa;

Bende duondi ematego chunywa;

Jiw chunywa, walem mayom e ng’uono Nyasaye; Amen.

11.        Maria sama ionge wakuyo;

Sama ilin’g alin’ga waparore;

Sama wabudhoni to chunywa ner;

Ka ionge to wadon’g gi lich;

Nikech sama ijwan’gowa to jochiende mor;

Parwa, walem mayom e ng’uono Nyasaye, Amen.

12.       To sama ibiro wamor sidan’g;

Nikech ka wamosi wapon’g gi mor;

Bende sama ipuonjowa to chunywa nyak;

In e tachwa mamenyonwa yo;

In e okumbawa magen’gonwa;

Bende in e odungawa mwakedogo;

Morni e morwa, to bironi e gwethwa;

Wecheni gerowa, siemni to rieyowa;

Konywa; Walem mayom e n’guono Nyasaye; Amen.

13.       Bikra Maria kul wiyi piny mondo irangwa;

Kik ber mar Silita mi wiyi wil kodwa;

Rangie piny jorotenge, ne kaka nyosro obagowa kodi;

Ne kaka siasa koda bund-ich opogowa kodi;

Ne kaka modhi mane ikwero osegolowa eyo;

Raha mane igolowa emawadokie;

Chiemo mane itamori ema wachamo;

Kuoth gi miriambo, sunga gi n’gayi opon’go Klisiani;

Wakiare wanjawore, kendo wathin’gi wadun’gni;

To Mama kik iwewa, kik ikunwa;

Bi parwa idwokwa eyo; puonj jogi mondo iriegi;

Taa jogi ipon’g abila; nimar kijwan’gogi n’gama nopaki;

Gin e jogi miseko manyo; gin e jogi miseko luongo;

Tim ng’uononi ikony ogandani;

Ware konywa; Walem mayom e ng’uono Nyasaye; Amen.

14.       In Maria mayande nogoyo ligala kaonge dichwo;

Piny ne chokore ka wuoro, ni imiyo manade magoyo ligala kende;

To kare neok gin’geyo ni polo emane oori e piny;

Neok gin’geyo ni polo emane otiayo seyi mondo ilor e piny, un kod Simeo taya;

Maria wan emane polo oori mondo ichokwa;

Donge wan emane polo oori mondo igolwa e nawi koda Ndagla, juok koda ajuoke;

Donge wan emane polo oori mondo igolwa ei on’gono koda nan’go buru;

Donge Mama wan emane ibiro mondo inyiswa yo, yor ngima mochwere;

Makulata wadwokoni erokamano kuom luongowa kendo lokowa magi;

Ritwa ndalo duto kapod wangima; tegwa pile kisiemonwa yo;

Mi wajok gi marichowa kendo wakwergi gi chuny motur;

Kendo mi warit chikeni gi puonjni, mondo ibed jakakorwa ndalowa te;

Konywa, walem mayom e ng’uono Nyasaye; Amen.

15.       In  e Awiti mane piny owito oko, maji oyanyo ewan’gayo;

In e Nyar Mgondho mane Mai Kombare ogolo e nam;

In e Min Omolo Kanyunja mane ochando kar buoro;

In e Nyaima mane oimo gwen’g mar Simbi ka anjawo opon’go;

In e Auka yamo mane oromo gi Petro Oswago etiend Aora Kitweru;

In e Auka yamo mane oromo gi Johanes Juma Pesa e kanisa Kopere;

In e Maria mane otiso Maria Ragot e gwen’g Nyabondo, ei Nyakach, kendo omiyo teko mar tiso rombe;

In e Maria mane ogolo yadh chang e gwen’g Bukoba;

In e Maria mane oloko Vitalis Okelo Oketa ka ja-kon’go mangoga;

Bikra Maria in e sinani mane onano kod thurwa ka otimo mudho mandiwa;

Kik ijwan’gwa koro; konywa;

Walem mayom e ng’uono Nyasaye; Amen.

16.       Maria ne isandori ne thurwa;

Par ndalo mane iwuotho e gwengewa, Matindo koda madongo;

Par ndalo mane mon wuokni oko kayanyi e wan’g yore; ni jacham nyithindo kalo;

Par ndalo mane nyithindo luwi ka werni ka janeko e wan’gyo;

Par ndalo mane ichando kar buoro e thurwa;

Piny ne yusoni kendo runi oko e pap;

Chien’g ne chami oko, koth be goyi oko e wan’gyo;

Luya ne chotni godiechien’g, to koyo ne chami oko gotieno;

To Mama ne ok ijok kodwa, wan jorotenge;

Omiyo parwa, kik ijwan’gwa;

Walem mayom e ng’uono Nyasaye. Amen.