Puonj Simeo Melkio, Mombasa Magongo, 6/6/1970

Saa 6:35 Odhiambo

Ok Adwar Dwanyruok

1.       Oyawore nyithi Nyasaye.

2.       Gima adagi achiel (en ni) in ja Bishop in ema igolo maricho mag Pete kendo in ema idwanyori gi dhako e lum.

3.       Ere pi ma nolwokni chilo?

4.       In Padri to koro eka joma nyiri matindo gi iduwori kodgi.

5.       Ubiro jogo Nyasaye mit udhiye mach.

6.       Bishop ema akuongo asiemo, gin ema gipuonjo jo Padri (timbe gi), nimar oneno kuomi.

7.       Ka ikuongo imiyo guok rin’go bende ka ichako imiye chogo doyie?

8.       Ka in Padri to in ma ikuongo siemo ng’ato, koro bradha biro sieme koso goye?

9.       To ka in madha kata sista to okawi (ichodi) gi bradha mano bende ber?

10.     Kata ka in madha to ikawo Bishop iloko chwori, kata in Padri iloko madha chiegi, kare ne wabiro dwaro mon gi chwo kae koso?

11.     Ka inywolo nyathi ma koro osedongo obet maduon’g, dinind kode e ot achiel koso? To ka owinjo ka ikuotho, en to dikiny okuoth machal nade?

Beduru Jok Moluorore

12.     Emomiyo awachonu, panduru dugu. To ok ni ipandori ka piny olil to idhi golo chi ng’ato iketho godo.

13.     Ooyo, ka ringri ohewi, dhi odi ir chiegi. To kapok inyombo to nyombi, to ka ing’ich to kik inyombi.

14.     Nyaka ubed joma oluorore.

15.     To apenjou, msungu cha kapo ni ondiki tich, bende onyorore kuomi? Ok donyorre kapod okia kiti.

16.     Nyithind Nyasaye, kuma ji nwan’ge nyak gikia, bende inyalo nyuolie lum nimar ok rach.

17.     To ka inyalo nyuol gi chi “Kano” to in ja South Nyanza, ka ogik chien’g ma jo South Nyanza kedo gi jo Kano, donge nyathini no ema nyalo kuongo chwowi gi ton’g manegi kabisa.

Dhako Ma Chwore Oriembo

18.     Dhako ma chwore oriembo obed mana kuom Jesus. Ka Nyasaye oneno ni miye nyathi ma iluongo ni Isaka to omiye.

19.     Isaka ne en nyathi achiel, to Nyasaye ema nong’eyo kaka Isaka ne obiro, ok Sara.

Weuru Duwrruok

20.     Bishop kopado lemb Ja Kristus gi lwete mos kowacho weche mag confermasio, kata Padri komiyowa Sakramit, en wuora ok odwanyre.

21.     Kik uduw wuod dhano, polo odagi duwrruok. Uduwore ahinya, kik utimo kamano.

22.     Gik mautimo richo ahinya. Ka utimo tim Adam to Nyasaye biro timou marach kaka nene otim Adam.

23.     Yawa weche ma asepuonjogo oromo kabisa.

Teko Mar Yath Mtakatifu

24.     Kendo tuoche nobed mathoth ei piny ma ng’ama ok oparo wuod dhano to tuo nonian’g kode nyaka e mach ma nyaka chien’g.

25.     Jochiende luwore kodu ahinya jopiny masira, kaw uru pi mar hawi ema usik ka ukiro kuom joweteu, kendo ema enobed yath.

26.     Pi Nyasaye ema nokir kuomu kende un jok matuo mondo ubed mangima higni gi higni. Amen.

27.     Ng’at mon’geyo ni osetiyo kod yadh piny kata yadh duka oparre ahinya. E pinyni to ok wadew, to e polo kucha to onge donjo. Ng’at ma kamano ochak ywakne Nyasaye ahinya.

28.     Adier adier awachonu, unune polo koyawore ne jok maler, diek to norem oko.

29.     Nyithindo matindo nokwedre gi wuonegi, kendo wuone nokwedre koda nyithindo mane ginywolo. To chien’g giko, wuon nyithindo maduon’g nobi e piny kendo.

30.     Bradha kik dwanyre kod jatich Jadolo, mano richo maduon’g ahinya.

Puonj Simeo Melkio, Nakiga Uganda, 25/6/1969

Tich Ariyo

Johanes Batista

1.       Johanes Batista, ma wuod Zakaria, ne opuonjo oko e thim. Johanes ma wuod Zakaria kod Elizabeth ne chamo mor kich gi dede.

2.       Johanes Batista ne rwako law ngamia, ne otwe iye kod okanda, to ne ochamo mor kich gi dede.

3.       Johanes ne opuonjo gi thuon, kendo ka ok oluoro wan’g n’gato.

4.       Kane Johanes oneno Ruodhwa Jesus Kristus, ne owacho niya: “Neuru Nyarombo Nyasaye makawo maricho mag piny.”

5.       “Ng’at moro biro ban’ga moloya nimar ne okuongona, oduon’gna. Ok anyal kulore lonyo wuochene nimar okuongona, oduon’gna.

6.       Gokinyi, Jesus Kristus nodhi kuom Johanes Batista ma wuod Zakaria; gokinyi Johanes ne ochungo e dho aora Jordan.

7.       Kane Johanes oneno Ruodhwa Jesus Kristus, ne owacho niya: “Neuru Nyarombo magolo maricho mag piny.”

Jopuonjre Johanes Odhi Ir Jesus

8.       Jolup Johanes ariyo, Andrea kod Johanes omin mare. Jolup Johanes gi ne odhi ir Jesus Kristus ma Ja-Nazareth, ne gi penjo Jesus Kristus kuma ne oaye.

9.       Jaduon’g iya kanye?

10.     Ruodhwa nodwoko niya: “Un udwaro kuma adakie, doguru ir Johanes. (To) biuru kuoma un ji ma ojony kendo ma otin’gore mapek.”

11.     “Un joma kech gi riyo oloyo, biuru mondo amiu pi umodhi. Kendo biuru ira mondo amiu chiemo mar ngima maokrum. Lu uru ban’ga kuma adhiye.”

12.     Jogo duto ne oluwo ban’g Ruodhwa, gi duto te maonge ng’ama ne orem kata matin.

13.     Jogo duto mane oluwo ban’g Ruodhwa ne gi neno mor man kuro ahinya.

Jesus Ja Nazareth

14.     Jesus Kristus ma Ja Nazareth ne onywole e Bethlehem, e kund dhok, piny Jo-Yahudi.

15.     Ruodhwa oja Nazareth.

16.     Ruodhwa ne opuonjo e Nazareth e dho nam. Ruodhwa ne opuonjo kuonde maboyo kendo kuonde machiegni.

17.     Ruodhwa ok owinjore idonj e bwo tat oda to wach mana wach kende mi chunya nokwo.

Jesus Ne Opuonjo

18.     Ruodhwa ne opuonjo nyaka piny oru.

19.     Ne othiedho (ochango) ji, ne ogolo juogi.

20.     “Chien’g giko piny anagol juogi kuom ji mobiro kuoma, to motamore juogi nonege.”

21.     Ruodhwa Jesus Kristus ne oloko pi Divai mane omadhi gi ji mathoth ahinya. Mano hono mokwongo mane Jesus Kristus otimo Galilaya Kana.

22.     Jesus nothiedho midhusi kuom mar Petro ma wuod Yona.

23.     Adier adier, awachonu niya maok awuondou, Jesus Kristus ne othiedho ji matuo e saa odhiambo, sama piny okia.

24.     Ne othiedho ji matuo mane oyir, ji ma nigi Jochiende.

25.     Adier adier, ji duto ne owuoro hono mane Jesus otimo.

Jesus Oduogo Kaka Simeo

26.     An Nyasaye majanyiego machulo kwor kuom richo.

27.     Chulo kwor anachulni, kendo kaka isando nyithinda matindo e kaka anasandi.

28.     Nyithinda duto te ma anabedgo e piny masira moyie koda nolu ban’ga. To modagi to ok nolu ban’ga to ginibed thenge.

29.     Eka nochopi dho joote niya: “E ndalo giko anaduogi kod kitu kod chalu. Anakonyu tiyo tije duto masandou e piny masira.”

Puonj Simeo Melkio, Nzoia Efeso, 27/1/1974

Gima Omiyo Ok Agol Fanjili

1.       Gima mona golonu Fanjili to nikech gima awacho to ok tim.

2.       Legion Maria an ema akelonu, to ka utugo to abiro ketho Legion Maria. An emane ang’iewe kod remba.

3.       To gima anyisu, ka jatendu onyisou wach, ndikuru to mondo uti godo.

Sadaka Ok Cham

4.       Sadaka to gin mag jok modhier, ma ng’ama ochamo to ong’e maber ni dalani orundore.

Duol Mamuol Ema Kwayo Rombe

5.       Kata kamano, gima omiyo dhano (Jokristus) duto oke (en ni) dwol matek ok kwa rombe.

6.       Gima omiyo awacho kamano, jokwath ohol (owir/oketi) mang’eny.

7.       Bishobe moko nitie maok owinjore kod tich, ema omiyo rombe ke.

8.       Ach-Bishop Albert Aloo, en to pod obandho tij Kadinar nyaka sani to podi, nyaka chopi olokre Mtakatifu (eka noyud tij Kadinar).

Weche Gedo

9.       Ne awacho chon ni yawa ger uru kanisa chon. Nyaka nene, od Mama (Bikra Maria) ok chal kaka odni chalo ni.

10.     Ka gero Klisia otamou to wach uru ni utamoru mana e mwandu. Chak uru chon, geduru.

11.     Pinyni biro bedo komunist to unuywagi, to biro timore.

12.     Un johawi un joma oyie kuom Nyasaye. Geruru kanisa, kite eri aneno kae.

Asechiwo Remba

13.     An awuon, ne asechiwo remba. Mondo piny mangima ong’e ni asechiwo remba.

14.     To ng’ama wacho adieri piny kwiny go tetete.

15.     Ng’ama ofuwo, roko (gol) odok eite mondo obed mariek.

Unutel Nade Jotelo

16.     Unutel nade, jotelo?

17.     Kichamo Sadaka, Malaika ywakni, Jotakatifu bende ywak.

18.     An jamiriambo ayie wachne (kuom) higni 15 (kende), to ka ochopo higni 16 to adagi chuth ma koro ok adwari, ma kata inyon tienda to adagi.

19.     Lemo kende.

20.     To kik ng’ato tho ka chunye kuotho nitie. Parre uru, timno rach.

Dongrruok Maru Rach

21.     Nyithindwa, Dongrruok maru rach. Owino bende orado kod Nyambok to onge ng’ama anyalo seyo.

22.     Un jok ma odire kod gik moko eudi, un bende piny polo odirenu.

Adwaro Jodolo Moti

23.     Adwaro mondo oket jodongo moti mondo gibed Pate ei kanisa, eka kanisauni noriere.

24.     (Koseket Jodolo moti) koro eka Jo Pate matindo okikre eigi, eka kanisa nobed kare. To nono to kanisa oyowore (okethore).

25.     Ka ine mae (nyakoni/dhakoni), gi ich; ine mae, gi ich. Koro mano an (Simeo) ema amiyogi iye? Kijana tien’gnani oketho kanisa.

26.     Gima omiyo an apingo (atamora) mon matindo ma omi mathe, gi wuotho koni gi koni ka gi terore kod chuo. Ka giduogo dala to chuore ok odwar.

Legion Maria Ok Chamie Msahara

27.     Legion Maria ok Chamie Msahara, ma ng’ama oneno ni othagre ochak chon owe tich.

28.     An mondi ema remba ochwerie pinyni to pok uwinje ka akwayou Msahara.

29.     Un duto tetete, Jokristus, wageruru kanisa kuom yie.

30.     Miriambo (yare) Odiechien’g makawuono kik chak kel kuoma. To ka un kod wach ma adiera to unyiso jodong kanisa, ma ok an.

31.     Ng’at ma jamiriambo ok nyal donjo e piny Nyasaye. To miriambo to tow. Omiyo an to adagi miriambo.

                  

Puonj Simeo Melkio, Nakiga Uganda, 24/6/1969

Saa 3:10 Otieno (Skul Mokuongo chope ei Uganda)

Puonj Kuom Buch Polo

1.       Kane awuok e piny masira kaeni, ne anuan’go ka iyalo ji malit ahinya (e polo). Jok mang’eny ma dhi e mach.

2.       Jo ndagla (dhi e mach). Anuan’go jajuok kobedo duk ka iyale kod atonga moting’o choke ji kod wiye guogi. Oyalgi ahinya ma jok ma bura oloyo odhi e mach.

3.       Piny polo lemo kende ema nitiere. Onge dhako kata dichwo, ji duto gin kaka Malaike kod Jotakatifu.

4.       Onge dhako gi dichwo, ji duto chalre te. To lemo kende e man e polo.

5.       Kucha ka utero kata lemo mar dhi chiemo to itero mana kaka itero e pinywa ka maok opogore kata matin.

6.       Lemo mar dhi chiemo? Nyasachwa miwa hapi kuom chiembwa bende ma wabiro nwang’o, kuom ng’uononi nikech Kristus nogo Ruodhwa, Amen.

7.       Ne anuan’go ka ji madhi e mach ng’eny ahinya. (Kendo) nikech yiewa tin ahinya emomiyo wadhi e mach.

8.       Kuom jok moyie kuom Nyasaye, dhoranga polo lach ahinya moloyo dho mach maok tho.

Gima Omiyo Ji Dhi e Mach Maok Tho

9.       Anuan’go jo mang’eny ahinya ma iluongo ni binadamu mangima kanitiere e polo.

10.     To emach maoktho bende jok mamon ng’enyie ahinya kod jok ma nyiri, kod chwo. To ipogo jok ma nyiri gi jok mamon kod jok machwo yorgi, to gi chamo gik malich ahinya (ogwende kod thuonde) e mach maoktho.

11.     Gima omiyo wadhi e mach maoktho en ni marichowa ng’eny moloyo Bandera gi kwar. Jowadwa, emomiyo walamuru mondo wadhi e polo.

Jesus Kristus Nitie E Dhorangach

12.     Kata ka wuoth ogik e pinywa ka to wanapo apoya ka piny orunwa e kor yo (wapowore e yo) ka wachiko yor Sayun dala maler maonge chilo.

13.     Jesus Kristus anuan’go e dhorangach ka oting’o musalape e goke, remo chwer ka mihula kendo nikwop marichowa.

14.     Odwaro ni mondo oketh piny to (pok oketho) nikech marichowa ng’eny ahinya. Dhano duon’g to onyap.

Misa Isomo E Polo

15.     E piny polo Misa isome saa achiel mar okinyi kendo saa auchiel mar Odiechien’g. (Lemo nitie) seche duto, onge yweyo kata matin.

16.     Jesus Kristus nopimona kaka ne otin’go musalape e goke maonge tach.

Jachien Oluoro Bura Momaki Kuom Jesus

17.     Jachien wacho ni to in ma iwacho ni nene awuondi, nene inena kanye? Ne ineno kita kachalo nade ma koro imako na bura kuom ng’atni?

18.     To Jesus to penjo wuode ni, nyathina jachiendni oriamboni koso ne inene e piny masira adiera? Ne ineno ka kite chalo nade?

19.     Nyasaye wacho ni, iriambo Jachien, oloyi gi bura dhi e mach.

Petro Nitiere E Dhorangach

20.     Petro ochun’g e wang’yo, e wan’g rangach ka yawo ne jok maler. Jok maricho to bat koracham, mach maoktho.

21.     Owacho ni, Defes, par kaka ne itimo ne owadu malit, in bende wan’g mana e mach, cham mana ogwende gi nyange gi opuge gi kalagwena gi thuonde.

Luong Mar Jesus

22.     Jesus nowacho niya, biuru nyithinda un joma kech gi riyo oloyo. Biuru ira mondo amiu chiemo mar ngima maokrum.

23.     Un jok ma ogangore mapek, un jok matuo, biuru ira mondo aluoku.

24.     Lemo mar Yie emanokwo ng’ama tuo. Ka yieni ochopo, ruoth nokonyi kendo nochieri, kendo kain gi marichoni nogolni.

25.     Kaka utimo ne owadwa matin e kaka natimnu. Ne umon kode, an bende anuan’gou. Dhiuru mana e bat kor acham.

26.     An e yo kendo an e adieri. Ngima bende an e ngima. Mano duond Jesus Ja Nazareth.

Jotakatifu Nitiere E Dhorangach

27.     Abraham kod Susana nitiere e dhorangach; kod Petro wuod Yona gi Kathorina. Jogo e weg amur (ruhusa/ng’uono), ma ka ok gi yieni to ok idonjie wan’g rangach. Gin kod Bikra Maria ma wuon dala. Jogo e weg amur.