Puonj Simeo Melkio, Boro Mission, 18/10/1981

Saa 7:08

Kawuono Sauri Mar Nyasaye

1.       Nyasaye Wuon manyalo gik moko duto, kendo wuon mirembe; Nyasaye ma konyo jok ma odhier kendo okonyo jok ma omewo; Nyasaye olokore dhano kendo obedo ei Jo-Yahudi.

Puonj Simeo Melkio, St. Peter Manyatta, Kisumu, 5/11/1989

Saa 6:45

Kinde Ochopo Mar Dok Ruoth

1.       Lwenje kod lwenje oluoro piny, piny tungni koni gi koni.

2.       Nyasaye oseoro malaikene mondo okony lweny to gi yudo ka lemo onge.

3.       E higa mar 1963, Legion Maria nene oyudo loch gi. To Jachien bende obiro kod Jochiende man’geny gin e piny kendo gi dwaro chako tijgi e higa mar 1991.

Puonj Simeo Melkio, St. Peter Manyatta, Kisumu, 31/7/1991

Legion Maria En Mar Bikra Maria

1.       Amoso jo Nairobi, Mombasa, Hola nyaka Ramisi, kendo amor kodu uduto.

2.       Nyasaye mochweyo polo gi piny ohero nyithinde to nyithinde to ok ohere, gi timo timbe ma mono maok owinjore ni Nyasaye.

Puonj Simeo Melkio, Jerusalem Amoyo, 7/6/1987

E Kom Duon’g, Od Siprosa

Weche Jesus Gi Wasungu ma Switzerland

1.       Jesus ne owuoyo gi Wasungu mag Switzerland kane ofwenyore apoya kane ochokore gi ji buora.

Puonj Simeo Melkio, Nazareth Mission, 7/6/1973

Saa 6, Tich An’gwen

Chenjo Bishobe kod Pete

1.       An apenjo Kadinar maduon’g kod Kadinache matindo, ka uchenjo Bishop, bende Bishop machon (mawuok/migolo) kuongo wuotho kod Bishop mawendo koso?

2.       Mano apenjo; ng’ama openjo ok oketho.

Puonj Simeo Melkio, Nazareth Mission: Simeo Wuod Nyasaye

Saa 5:09 Otieno

Kenya e Polo

1.       Oyawore uru uduto!

2.       Kenya wa ni, duto e piny mangima, en e polo kuma dhano odakie kod Nyasaye.

3.       Ber ahinya; ober ahinya; emomiyo kik ukethi e pinyka kata achiel mondo un bende udhi umor e polo kuno.

Puonj Simeo Melkio, Jerusalem Amoyo, 11/5/1979

Tich Abich

Weche Daniel Janabi

1.       Daniel ma Ja-Hulo; Daniel ne okoro wach ka ne owacho ni e ndalo mag giko piny, e ndalo go ka uneno ka miriambo ng’eny e piny, bunde ng’eny e piny, kendo ka nyiduon’g kod asili nogore, mondo ung’e ni seche oromo.

Puonj Simeo Melkio, St Mary Makongeni, Nairobi, 16/7/1977

Aketo Sheriana

1.       In Nomine Patris, et Filio, et Spiritus Sanctus. Amen.

2.       Adwaro keto Sheriana ka wuok South Nyanza ma aluor nyaka Karachuonyo, Kadem gi Kanyamkago.

3.       Kendo adwaro kwano jopolo (Jo Legion) mapod ler, maonge kod dhako (mon) an’gwen. To ma anayud kod dhako achiel en jahawi.

Puonj Simeo Melkio, Jerusalem Amoyo 1/8/1979

Kik Udonj E Bugo

1.       Aneno ka wachiko bugo matut to ok wanawuogie bugono.

2.       Aneno otut to kik uywagi, mano lek mane Nyasaye onyisa gotieno. Omiyo water Rosari man’geny ahinya kod gero od Nyasaye, mano ema obed tichwa.

Guro Chike Dini

3.       Ka waguro chik, onego wagur ka wang’iyo bug ngima. Wagur ka wang’iyo buk machon mar Katholik gi mar CMS, nitie chike (e bugegi) mang’eny.

4.       Omiyo kik wagol chik mag miriambo, (mano) Nyasaye nyalo wan’gowa.

Ng’uono Ber Moloyo

5.       Buk (Muma) bende ondikie wach Jesus kuma ne owachoni ka owadu okosoni to ing’uonne.

6.       Nyasaye kane osechweyo piny, ochweyo dichiel kende. To gik maricho noyieki nowit e mach.

7.       Omiyo, gol uru chike ka ung’iyo Kitabu, mondo ugur chik ka umbeko nikech onge ng’at maler.

8.       Ng’ama onyombo kod ng’at maok onyombo, kod ng’ama chodo, girom (e nyim Nyasaye). Kendo kaka ng’at ma chodo nyalo nywolo nyathi e kaka ng’ama onyombo nyalo nywolo nyathi.

9.       Bende onge ng’ama ler. Jesus kende ema ler, en ema ok onyombo. Aler nade to an kod mon to kod nyithindo?

10.     Omiyo, ket uru chik to kik ukas ahinya. Ng’euru ni onge ng’at maler.

11.     Kik ng’ato sand wadgi (nikech richo), onge ng’ama ok kethi. Ji duto ketho mana te.

Chamo Sadaka

12.     Kuom Sadaka to chamo ber abera nikech in’geyo ni rembi iseng’iewo kod mach. Ng’ama hape ochwanyo nodonji (e polo).

13.     Puonj ng’ama ketho moloyo chunge kata goye marufuku.

Ja-Legion Kendore Mana Gi Ja-Legion

14.     Yawa, udhi e mach gi thuon nang’o to akwerou?

15.     Jopiny masira, kare miya uru itu.

16.     Ng’ama nokend nyar Kafiri ma ok lem, to kata ne en ja Legion Maria to oweyo otimo timbene, mach oluw piere tiir gi chiege no.

17.     Kata en sista mokawore gi ja Kafiri maok lem, kata Jalemo mayomyom ma lemo to timo timbene, Nyasaye oseweyou oko manade nikech bucha oserumo gi e pinyka.

18.     Jo piny masira, Ruodhwa ok inine kod wan’gi kendo ibiro neno masira ndalo ma Jesus biroe. Pod berberie anyiero kodu.

19.     Ndalo biro maok abi dewi kata in mana osiepna. Yawa jopiny masira, aweyou mondo utim timbeu, to ok ungeyo ni kend mag anjawo ok adwar nikech ema osekelo chode e Legion Maria kae.

Puonj Nyathini Yor Polo

20.     Jonyuol, cham uru mwandu ka ung’eyo ni ng’atno manopuonj nyathine mit dhi e polo, ng’atno nobed jahawi maduon’g.

21.     Nyasaye nomede ndalo kendo nogone erokamano maduon’g kuom reso chuny nyathineno.

22.     Yawa, kik ubol nyithindo e lak ondiegi, ayudo ka bura ni malo kae matek.

23.     Ja Legion one ni nyare otimo kend maber e nyim Nyasaye, bende onwan’go matrimonio maber e nyim Nyasaye. To wuode be (one ni otimo kamano).

24.     Ka ok kamano to Nyasaye oritogi e polo gi buch mach.

25.     Kend mag anjawo omiyo jopolo nyiera e polo ka ahinya, kata ero ung’iyo koda kamano.

Puonj Simeo Melkio, Mombasa Magongo, 6/6/1970

Saa 6:35 Odhiambo

Ok Adwar Dwanyruok

1.       Oyawore nyithi Nyasaye.

2.       Gima adagi achiel (en ni) in ja Bishop in ema igolo maricho mag Pete kendo in ema idwanyori gi dhako e lum.

3.       Ere pi ma nolwokni chilo?

4.       In Padri to koro eka joma nyiri matindo gi iduwori kodgi.

5.       Ubiro jogo Nyasaye mit udhiye mach.

6.       Bishop ema akuongo asiemo, gin ema gipuonjo jo Padri (timbe gi), nimar oneno kuomi.

7.       Ka ikuongo imiyo guok rin’go bende ka ichako imiye chogo doyie?

8.       Ka in Padri to in ma ikuongo siemo ng’ato, koro bradha biro sieme koso goye?

9.       To ka in madha kata sista to okawi (ichodi) gi bradha mano bende ber?

10.     Kata ka in madha to ikawo Bishop iloko chwori, kata in Padri iloko madha chiegi, kare ne wabiro dwaro mon gi chwo kae koso?

11.     Ka inywolo nyathi ma koro osedongo obet maduon’g, dinind kode e ot achiel koso? To ka owinjo ka ikuotho, en to dikiny okuoth machal nade?

Beduru Jok Moluorore

12.     Emomiyo awachonu, panduru dugu. To ok ni ipandori ka piny olil to idhi golo chi ng’ato iketho godo.

13.     Ooyo, ka ringri ohewi, dhi odi ir chiegi. To kapok inyombo to nyombi, to ka ing’ich to kik inyombi.

14.     Nyaka ubed joma oluorore.

15.     To apenjou, msungu cha kapo ni ondiki tich, bende onyorore kuomi? Ok donyorre kapod okia kiti.

16.     Nyithind Nyasaye, kuma ji nwan’ge nyak gikia, bende inyalo nyuolie lum nimar ok rach.

17.     To ka inyalo nyuol gi chi “Kano” to in ja South Nyanza, ka ogik chien’g ma jo South Nyanza kedo gi jo Kano, donge nyathini no ema nyalo kuongo chwowi gi ton’g manegi kabisa.

Dhako Ma Chwore Oriembo

18.     Dhako ma chwore oriembo obed mana kuom Jesus. Ka Nyasaye oneno ni miye nyathi ma iluongo ni Isaka to omiye.

19.     Isaka ne en nyathi achiel, to Nyasaye ema nong’eyo kaka Isaka ne obiro, ok Sara.

Weuru Duwrruok

20.     Bishop kopado lemb Ja Kristus gi lwete mos kowacho weche mag confermasio, kata Padri komiyowa Sakramit, en wuora ok odwanyre.

21.     Kik uduw wuod dhano, polo odagi duwrruok. Uduwore ahinya, kik utimo kamano.

22.     Gik mautimo richo ahinya. Ka utimo tim Adam to Nyasaye biro timou marach kaka nene otim Adam.

23.     Yawa weche ma asepuonjogo oromo kabisa.

Teko Mar Yath Mtakatifu

24.     Kendo tuoche nobed mathoth ei piny ma ng’ama ok oparo wuod dhano to tuo nonian’g kode nyaka e mach ma nyaka chien’g.

25.     Jochiende luwore kodu ahinya jopiny masira, kaw uru pi mar hawi ema usik ka ukiro kuom joweteu, kendo ema enobed yath.

26.     Pi Nyasaye ema nokir kuomu kende un jok matuo mondo ubed mangima higni gi higni. Amen.

27.     Ng’at mon’geyo ni osetiyo kod yadh piny kata yadh duka oparre ahinya. E pinyni to ok wadew, to e polo kucha to onge donjo. Ng’at ma kamano ochak ywakne Nyasaye ahinya.

28.     Adier adier awachonu, unune polo koyawore ne jok maler, diek to norem oko.

29.     Nyithindo matindo nokwedre gi wuonegi, kendo wuone nokwedre koda nyithindo mane ginywolo. To chien’g giko, wuon nyithindo maduon’g nobi e piny kendo.

30.     Bradha kik dwanyre kod jatich Jadolo, mano richo maduon’g ahinya.

Puonj Simeo Melkio, Nakiga Uganda, 25/6/1969

Tich Ariyo

Johanes Batista

1.       Johanes Batista, ma wuod Zakaria, ne opuonjo oko e thim. Johanes ma wuod Zakaria kod Elizabeth ne chamo mor kich gi dede.

2.       Johanes Batista ne rwako law ngamia, ne otwe iye kod okanda, to ne ochamo mor kich gi dede.

3.       Johanes ne opuonjo gi thuon, kendo ka ok oluoro wan’g n’gato.

4.       Kane Johanes oneno Ruodhwa Jesus Kristus, ne owacho niya: “Neuru Nyarombo Nyasaye makawo maricho mag piny.”

5.       “Ng’at moro biro ban’ga moloya nimar ne okuongona, oduon’gna. Ok anyal kulore lonyo wuochene nimar okuongona, oduon’gna.

6.       Gokinyi, Jesus Kristus nodhi kuom Johanes Batista ma wuod Zakaria; gokinyi Johanes ne ochungo e dho aora Jordan.

7.       Kane Johanes oneno Ruodhwa Jesus Kristus, ne owacho niya: “Neuru Nyarombo magolo maricho mag piny.”

Jopuonjre Johanes Odhi Ir Jesus

8.       Jolup Johanes ariyo, Andrea kod Johanes omin mare. Jolup Johanes gi ne odhi ir Jesus Kristus ma Ja-Nazareth, ne gi penjo Jesus Kristus kuma ne oaye.

9.       Jaduon’g iya kanye?

10.     Ruodhwa nodwoko niya: “Un udwaro kuma adakie, doguru ir Johanes. (To) biuru kuoma un ji ma ojony kendo ma otin’gore mapek.”

11.     “Un joma kech gi riyo oloyo, biuru mondo amiu pi umodhi. Kendo biuru ira mondo amiu chiemo mar ngima maokrum. Lu uru ban’ga kuma adhiye.”

12.     Jogo duto ne oluwo ban’g Ruodhwa, gi duto te maonge ng’ama ne orem kata matin.

13.     Jogo duto mane oluwo ban’g Ruodhwa ne gi neno mor man kuro ahinya.

Jesus Ja Nazareth

14.     Jesus Kristus ma Ja Nazareth ne onywole e Bethlehem, e kund dhok, piny Jo-Yahudi.

15.     Ruodhwa oja Nazareth.

16.     Ruodhwa ne opuonjo e Nazareth e dho nam. Ruodhwa ne opuonjo kuonde maboyo kendo kuonde machiegni.

17.     Ruodhwa ok owinjore idonj e bwo tat oda to wach mana wach kende mi chunya nokwo.

Jesus Ne Opuonjo

18.     Ruodhwa ne opuonjo nyaka piny oru.

19.     Ne othiedho (ochango) ji, ne ogolo juogi.

20.     “Chien’g giko piny anagol juogi kuom ji mobiro kuoma, to motamore juogi nonege.”

21.     Ruodhwa Jesus Kristus ne oloko pi Divai mane omadhi gi ji mathoth ahinya. Mano hono mokwongo mane Jesus Kristus otimo Galilaya Kana.

22.     Jesus nothiedho midhusi kuom mar Petro ma wuod Yona.

23.     Adier adier, awachonu niya maok awuondou, Jesus Kristus ne othiedho ji matuo e saa odhiambo, sama piny okia.

24.     Ne othiedho ji matuo mane oyir, ji ma nigi Jochiende.

25.     Adier adier, ji duto ne owuoro hono mane Jesus otimo.

Jesus Oduogo Kaka Simeo

26.     An Nyasaye majanyiego machulo kwor kuom richo.

27.     Chulo kwor anachulni, kendo kaka isando nyithinda matindo e kaka anasandi.

28.     Nyithinda duto te ma anabedgo e piny masira moyie koda nolu ban’ga. To modagi to ok nolu ban’ga to ginibed thenge.

29.     Eka nochopi dho joote niya: “E ndalo giko anaduogi kod kitu kod chalu. Anakonyu tiyo tije duto masandou e piny masira.”

Puonj Simeo Melkio, Nzoia Efeso, 27/1/1974

Gima Omiyo Ok Agol Fanjili

1.       Gima mona golonu Fanjili to nikech gima awacho to ok tim.

2.       Legion Maria an ema akelonu, to ka utugo to abiro ketho Legion Maria. An emane ang’iewe kod remba.

3.       To gima anyisu, ka jatendu onyisou wach, ndikuru to mondo uti godo.

Sadaka Ok Cham

4.       Sadaka to gin mag jok modhier, ma ng’ama ochamo to ong’e maber ni dalani orundore.

Duol Mamuol Ema Kwayo Rombe

5.       Kata kamano, gima omiyo dhano (Jokristus) duto oke (en ni) dwol matek ok kwa rombe.

6.       Gima omiyo awacho kamano, jokwath ohol (owir/oketi) mang’eny.

7.       Bishobe moko nitie maok owinjore kod tich, ema omiyo rombe ke.

8.       Ach-Bishop Albert Aloo, en to pod obandho tij Kadinar nyaka sani to podi, nyaka chopi olokre Mtakatifu (eka noyud tij Kadinar).

Weche Gedo

9.       Ne awacho chon ni yawa ger uru kanisa chon. Nyaka nene, od Mama (Bikra Maria) ok chal kaka odni chalo ni.

10.     Ka gero Klisia otamou to wach uru ni utamoru mana e mwandu. Chak uru chon, geduru.

11.     Pinyni biro bedo komunist to unuywagi, to biro timore.

12.     Un johawi un joma oyie kuom Nyasaye. Geruru kanisa, kite eri aneno kae.

Asechiwo Remba

13.     An awuon, ne asechiwo remba. Mondo piny mangima ong’e ni asechiwo remba.

14.     To ng’ama wacho adieri piny kwiny go tetete.

15.     Ng’ama ofuwo, roko (gol) odok eite mondo obed mariek.

Unutel Nade Jotelo

16.     Unutel nade, jotelo?

17.     Kichamo Sadaka, Malaika ywakni, Jotakatifu bende ywak.

18.     An jamiriambo ayie wachne (kuom) higni 15 (kende), to ka ochopo higni 16 to adagi chuth ma koro ok adwari, ma kata inyon tienda to adagi.

19.     Lemo kende.

20.     To kik ng’ato tho ka chunye kuotho nitie. Parre uru, timno rach.

Dongrruok Maru Rach

21.     Nyithindwa, Dongrruok maru rach. Owino bende orado kod Nyambok to onge ng’ama anyalo seyo.

22.     Un jok ma odire kod gik moko eudi, un bende piny polo odirenu.

Adwaro Jodolo Moti

23.     Adwaro mondo oket jodongo moti mondo gibed Pate ei kanisa, eka kanisauni noriere.

24.     (Koseket Jodolo moti) koro eka Jo Pate matindo okikre eigi, eka kanisa nobed kare. To nono to kanisa oyowore (okethore).

25.     Ka ine mae (nyakoni/dhakoni), gi ich; ine mae, gi ich. Koro mano an (Simeo) ema amiyogi iye? Kijana tien’gnani oketho kanisa.

26.     Gima omiyo an apingo (atamora) mon matindo ma omi mathe, gi wuotho koni gi koni ka gi terore kod chuo. Ka giduogo dala to chuore ok odwar.

Legion Maria Ok Chamie Msahara

27.     Legion Maria ok Chamie Msahara, ma ng’ama oneno ni othagre ochak chon owe tich.

28.     An mondi ema remba ochwerie pinyni to pok uwinje ka akwayou Msahara.

29.     Un duto tetete, Jokristus, wageruru kanisa kuom yie.

30.     Miriambo (yare) Odiechien’g makawuono kik chak kel kuoma. To ka un kod wach ma adiera to unyiso jodong kanisa, ma ok an.

31.     Ng’at ma jamiriambo ok nyal donjo e piny Nyasaye. To miriambo to tow. Omiyo an to adagi miriambo.